22 ოქტომბერს დაგეგმილი თბილისიმარათონი - 2017 აღარ გაიმართება. მარათონის ორგანიზატორები გადაწყვეტილებას თბილისის მერიის განცხადებას უკავშირებენ.

"მიუხედავად იმისა რომ ღონისძიების გაუქმება მოხდა ჩვენგან დამოუკიდებელი მიზეზების გამო ჰაიდელბერგცემენტი და თბილისიმარათონის საორგანიზაციო ჯგუფი ბოდიშს უხდის ყველა მონაწილეს, სპონსორს, მხარდამჭერს და ბენეფიციარს", - ამბობენ მარათონის ორგანიზატორები.

მათი განცხადებით, თბილისის მერიისგან შეიტყეს, რომ თბილისის ქუჩებში არსებული სარემონტო სამუშაოების გამო ცენტრალური ქუჩების გადაკეტვა თბილისიმარათონისთვის გამოიწვევს სატრანსპორტო მოძრაობის პარალიზებას და თბილისელების გულის წყვეტას. მათივე განმარტებით, მერიამ მათ შესთავაზა გარბენი დაწყებულიყო დილით 7 საათზე ან მომხდარიყო ღონისძიების ლოკაციის შეცვლა.

თბილისის მერიის მიერ შეთავაზებული წინადადება მარათონის ორგანიზატორებს შემდეგი გარემოებების გამო მიუღებლად მიაჩნიათ:

  • ღონისძიების დილის 7 საათზე დაწყება - მორბენლები მარათონის დაწყებამდე დაახლოებით 2 საათით ადრე მოდიან ღონისძიებაზე რეგისტრაციის გავლის, სანომრე ნიშნების მიღების და ხელბარგის დასაწყობების მიზნით, დილის 5 საათზე ღონისძიების დაწყება ფიზიკურად შეუძლებელია და არ აკმაყოფილებს არც ერთ საერთაშორისო სტანდარტს;
  • ღონისძიების ლოკაციის შეცვლა - თბილისიმარათონი 2015 წლიდან მარათონებისა და გრძელ დისტანციებზე გარბენთა საერთაშორისო ასოციაციის (AIMS) წევრია და შედეგების დათვლაც მსოფლიოში აპრობირებული, Mika Timing-ის Official Timekeeping and Data Processing ავტომატური სისტემით ხორციელდება. სარბენი მარშრუტი 2016 წელს აიზომა AIMS-ის მიერ. იმის გამო, რომ ღონისძიებამდე სულ რამოდენიმე დღე რჩება შეუძლებელია ლოკალიის შეცვლა, სარბენი ტრასის გაზომვა და ტექნიკის გადაწყობა საჭიროებს სულ მცირე 2-თვიან წინასწარ პროცედურას.