"მე NGO-ში არ ვყოფილვარ, არც ირაკლი კობახიძე არ ყოფილა NGO-ში, არც მე არც ირაკლი კობახიძე — ჩვენ NGO-ში არ ვიყავით", — განაცხადა ოცნების პარლამენტის თავმჯდომარემ შალვა პაპუაშვილმა ბრიფინგზე ჟურნალისტის კითხვის საპასუხოდ — ჰქონდათ თუ არა მას და ირაკლი კობახიძეს ეგ ე.წ. "გაგრილების პერიოდი", NGO-დან პოლიტიკაში რომ მოვიდნენ.

მანამდე შალვა პაპუაშვილმა გრანტების კანონის გამკაცრებაზე ისაუბრა:

"ჩვენ უნდა უზრუნველყოთ, რომ არ იყოს "მბრუნავი კარის პრინციპი", როდესაც ხან NGO-ში არიან და შემდეგ ცდილობენ, მოიყვანონ პოლიტიკურ ხელისუფლებაში, ამ შემთხვევაში იგულისხმება პარტიები, რომ ამისთვის აიღონ ე.წ. "გაგრილების პერიოდი", რომელიც არსებობს საერთაშორისო პრაქტიკაში. მაგალითად როცა პოლიტიკაში საჯარო სექტორშია ადამიანი, მაგალითად ადამიანმა ევროპის რეკონსტრუქციის და განვითარების ბანკში დაიწყოს მუშაობა, სჭირდება 2-წლიანი პაუზა ე.წ. გაგრილების იმისთვის, რომ დაიწყოს იქ მუშაობა, როდესაც არის რისკი, რომ მისი წინა საქმიანობიდან გამომდინარე ახალ პოზიციაზე წინა ინტერესების გატარებას ექნება ადგილი. სერგი კაპანაძე არის ამის კარგი მაგალითი", — თქვა შალვა პაპუაშვილმა.

მისივე თქმით, ორგანიზაციებმა უნდა აირჩიონ, უცხოური ინტერესების გატარება უნდათ, თუ ქართველი ხალხის.

"იმ ორგანიზაციებიდან, ვისაც აქვს ძირითადად უცხოური დაფინანსება, თუკი უნდათ, რომ პარტიული საქმიანობა გააგრძელონ, აიღოს "გაგრილების" პერიოდი და ამის შედეგ მივიდეს პოლიტიკაში. აირჩიონ რა უნდათ, უცხოური ინტერესების გატარება, თუ ქართველი ხალხის. რაც შემეხება მე, მე არასამთავრობო ორგანიზაციაში არ ვყოფილვარ", — განაცხადა პაპუაშვილმა.

რაც შეეხება შალვა პაპუაშვილის კავშირებს დასავლურ კომპანიებთან, 2000-2001 წლებში ის იყო საადვოკატო ბიურო Heimes&Muller-ის ადვოკატის თანაშემწე;

2003-2007 წლებში იყო გერმანიის ტექნიკური თანამშრომლობის საზოგადოების (GTZ) უფროსი სამართლებრივი ექსპერტი;

2007-2015 წლებში იყო გერმანიის საერთაშორისო თანამშრომლობის საზოგადოების (GIZ) ჯგუფის ხელმძღვანელი;

2015-2017 წლებში იყო გერმანიის საერთაშორისო თანამშრომლობის საზოგადოების (GIZ) პროგრამის ხელმძღვანელის მოადგილე;

2017-2020 წლებში იყო გერმანიის საერთაშორისო თანამშრომლობის საზოგადოების (GIZ) საქართველოს გუნდის ხელმძღვანელი.

შეგახსენებთ, რომ 28 იანვარს ფრაქცია ქართული ოცნების თავმჯდომარემ, ირაკლი კირცხალიამ ბრიფინგზე განაცხადა, რომ "მოქალაქეთა პოლიტიკური გაერთიანებების შესახებ" ორგანულ კანონში პოლიტიკური პარტიის წევრობის შეზღუდვასთან დაკავშირებული ცვლილებები ხორციელდება: პირს, რომელიც დასაქმებულია ორგანიზაციაში, რომლის შემოსავლის 20%-ზე მეტი წლის განმავლობაში მიღებულია უცხოური ძალისგან, პოლიტიკური პარტიის წევრობა 8 წლის ეკრძალება.