ქართული ოცნებიდან თბილისის საკრებულოს თავმჯდომარეობის კანდიდატი, მოქმედი თავმჯდომარის პირველი მოადგილე, გიორგი ტყემალაძეა.

2014 წელს ტყემალაძე თბილისის მუნიციპალიტეტის მეხუთე მოწვევის საკრებულოს წევრი თოფაძე-მრეწველების საარჩევნო პროპორციული სიით გახდა. 2017 წლის არჩევნებში კი ქართული ოცნების სამგორის მაჟორიტარი დეპუტატობის კანდიდატად არის წარდგენილი.

ტყემალაძის 2016 წლის ქონებრივი დეკლარაციის თანახმად, ერთი წლის განმავლობაში, საკრებულოს თავმჯდომარის მოადგილის თანამდებობაზე მას აღებული აქვს 56 640 ლარი, ხოლო პოლიტიკური გაერთიანება - მრეწველობა გადაარჩენს საქართველოს წევრობისთვის - 21 875 ლარი.

გიორგი ტყემალაძე ფიგურირებს საერთაშორისო გამჭვირვალობა - საქართველოს ერთ-ერთ ბოლო პუბლიკაციაშიც, რომელიც საკრებულოს თანამდებობის პირთა ბიზნესთან კავშირებს ეხება. კვლევის თანახმად, ტყემალაძეს ბიზნეს წილების საკუთრება არ აქვს დეკლარირებული და საჯარო რეესტრის მონაცემებით დირექტორადაა რეგისტრირებული. კომერციული იურიდიული პირების ხელმძღვანელობა კი საკრებულოს წევრის სტატუსთან შეუთავსებელი საქმიანობაა.

განათლება და სამუშაო გამოცდილება

  • 2012 წლიდან - დღემდე საქართველოს ჩოგბურთის ფედერაციის ვიცე-პრეზიდენტი;
  • 2010 წლიდან - დღემდე საქართველოს ადგილობრივი თვითმმართველობის ეროვნული ასოციაციის ვიცე პრეზიდენტი;
  • 2010 წლიდან - დღემდე ევროსაბჭოს ადგილობრივი და რეგიონალური თვითმმართველობის კონგრესის წევრი;
  • 2010 - 2014 წლებში თბილისის მუნიციპალიტეტის მეოთხე მოწვევის საკრებულოს წევრი და თავმჯდომარის მოადგილე;
  • 2007 - 2010 წლებში თბილისის მუნიციპალიტეტის მესამე მოწვევის საკრებულოს წევრი;
  • 2006 - 2008 წლებში შ.პ.ს. ვეტპრეპარატი დირექტორი;
  • 2004 - 2006 წლებში საქართველოს ბიზნესმენთა ფედერაცია - ბიზნეს კომპანიებთან ურთიერთობის მენეჯერი;
  • 2003 - 2004 წლებში საქართველოს ეროვნული საინვესტიციო სააგენტო (დირექტორი)'
  • 2002 - 2003 წლებში საქართველოს ეროვნული საინვესტიციო სააგენტო (პირველი მოადგილე);
  • 2000 - 2002 წლებში საქართველოს სახელმწიფო კანცელარია (სახელმწიფო მინისტრის თანაშემწე);
  • 1998 - 2000 წლებში საქართველო ამერიკის ერთობლივი საწარმო "ჩალას-ვაინსი" (მენეჯერი);
  • 1999 წელს ეკონომისტის სპეციალობით დაამთავრა საქართველოს აგრარული აკადემიის აგროსამრეწველო ეკონომიკის მიმართულება;
  • 1997 წელს დაამთავრა საქართველოს აგრარული უნივერსიტეტი ინჟინერ-ტექნოლოგის სპეციალობით.