პარტია გახარია საქართველოსთვის წევრი ბერდია სიჭინავა დავოსის ეკონომიკურ ფორუმზე აზერბაიჯანის პრეზიდენტის, ოლჰამ ალიევის განცხადებას ეხმაურება იმის შესახებ, რომ "ამჟამად ტვირთების გადაზიდვა საქართველოს გავლით ხორციელდება, მაგრამ ერთ დღეს ეს სომხეთის გავლით მოხდება. ერთ დღეს სომხეთი პირდაპირ გადაზიდვებს განახორციელებს აზერბაიჯანიდან და ეს დღე არც ისე შორსაა".

სიჭინავა წერს, რომ "შეიძლება შუა დერეფნის ფუნქციის შესრულება კითხვის ნიშნის ქვეშ დადგეს და საერთოდ გვერდი აგვიაროს, რადგან ხელისუფლებაშია ძალა, რომელიც პოლიტიკურად იმდენად გამოთაყვანებულია, ვერავისთან ვერაფერი ვერ (ან არ) დაალაგა".

"სახელმწიფოს სატრანზიტო დერეფნის ფუნქციის ფორმირებისთვის აუცილებელია ეკონომიკური მოთხოვნა, გეოგრაფიული შესაძლებლობები და ამ ყველაფრის პოლიტიკური ორგანიზების ნება და უნარები, ერთდროულად არსებობდეს.

ვერანაირ სატრანზიტო დერეფნის ფუნქციას ვერ შეასრულებ, თუ სტაბილური ურთიერთობა არ გაქვს დასავლეთთან და აღმოსავლეთთან. ოქსიმორონია აგინებდე დასავლეთს (რომლის ისტორიული, რელიგიური და კულტურული ნაწილი ხარ) და მოლოდინი გქონდეს ამ ტვირთს დასავლეთი შენი გავლით მიიღებს, ან აგინებდე აღმოსავლეთს და იმედი გქონდეს ამ ტვირთს შენი გავლით გამოატარებენ, ასევე პირიქით.

მეტ-ნაკლებად ყველა ხელისუფალს, მეფეების, მთავრების და ფეოდალების ჩათვლით, ძვ. წ. აღრიცხვის II-I საუკუნეებიდან, რაც აბრეშუმის გზამ მუშაობა დაიწყო, კარგად ჰქონდა გააზრებული ამ ფუნქციის მნიშვნელობა ქვეყნისთვის.

ახლა ვარკვევთ, რომ შეიძლება შუა დერეფნის ფუნქციის შესრულება კითხვის ნიშნის ქვეშ დადგეს და საერთოდ გვერდი აგვიაროს, რადგან ხელისუფლებაშია ძალა, რომელიც პოლიტიკურად იმდენად გამოთაყვანებულია, ვერავისთან ვერაფერი ვერ (ან არ) დაალაგა.

ახლა სხედან ყველა საერთაშორისო პროცესისგან მოკვეთილები, იზოლირებულები და გამობუნძულებულები, მეგობრების მაგინებლები, ვინც სიტყვა უნდა შეგვაწიოს ასეთი გადაწყვეტილებების მიღების პროცესში და მთელ ქვეყანას ატყუებენ, თითქოს დავოსის ეკონომიკურ ფორუმზე და სხვა მნიშვნელოვან საერთაშორისო პლატფორმებზე ისეთი არაფერი ხდება და მანდ მონაწილეობა მხოლოდ ფორმალობაა", — წერს ბერდია სიჭინავა.