"ამჟამად ტვირთების გადაზიდვა საქართველოს გავლით ხორციელდება, მაგრამ ერთ დღეს ეს სომხეთის გავლით მოხდება. ერთ დღეს სომხეთი პირდაპირ გადაზიდვებს განახორციელებს აზერბაიჯანიდან და ეს დღე არც ისე შორსაა", — ამის შესახებ აზერბაიჯანის პრეზიდენტმა ილჰამ ალიევმა დავოსში, მსოფლიო ეკონომიკური ფორუმის პანელურ სესიაზე "ევრაზიის ეკონომიკური იდენტობის განსაზღვრა" განაცხადა. ინფორმაციას აზერბაიჯანული მედია Report ავრცელებს.

"ჩვენ ახლა მივიღეთ სომხური მხარის მოთხოვნა სომხეთიდან რუსეთში ტრანზიტის უზრუნველყოფის შესახებ. ამრიგად, ჩვენ ფაქტობრივად ცალმხრივად გავხსენით დერეფნები. დიახ, ამჟამად ტვირთების გადაზიდვა საქართველოს გავლით ხორციელდება, მაგრამ ერთ დღეს ეს სომხეთის გავლით მოხდება. ერთ დღეს სომხეთი პირდაპირ გადაზიდვებს განახორციელებს აზერბაიჯანიდან და ეს დღე არც ისე შორსაა", — თქვა ალიევმა.

აზერბაიჯანის პრიორიტეტია რეგიონის ქვეყნებთან ურთიერთობა, დასძინა მან და ხაზი გაუსვა, რომ ბაქოსა და ერევანს შორის ფაქტობრივი მშვიდობის დამყარების შემდეგ, "დაიწყეს ეკონომიკური თანამშრომლობა და ექსპორტის ოპერაციები".

ალიევმა აღნიშნა, რომ აზერბაიჯანსა და სომხეთს შორის შეთანხმებები პრაქტიკულ შედეგებში გადადის. მისი თქმით, "დღეს მშვიდობის ნაყოფი თანამშრომლობაში გამოიხატება". კერძოდ, სტრატეგიულად მნიშვნელოვანი ტვირთები, მათ შორის ნავთობპროდუქტები, აზერბაიჯანიდან სომხეთში გადაიზიდება. ეს თავისთავად ფასების შემცირებას იწვევს. სულ რაღაც ორი ან სამი წლის წინ ეს სრულიად წარმოუდგენელი იქნებოდა, მაგრამ დღეს ეს უკვე რეალობაა. და მე მჯერა, რომ ამ პროცესს ვერაფერი შეაფერხებს", — თქვა პრეზიდენტმა.

ოცნების პრემიერი, ირაკლი კობახიძე დავოსის ეკონომიკის ფორუმზე წელსაც არ მიიწვიეს. საქართველო დავოსის ეკონომიკურ ფორუმზე ბოლო 2024 წელს მიიღო მონაწილეობა და იქ საქართველოს ირაკლი ღარიბაშვილი წარმოადგენდა.