ტყიბულის მუნიციპალიტეტის სოფელ მოწამეთაში დაცვისა და კრიმინალური პოლიციის წარმომადგენლებმა რესტორანში მიხეილ შუფუტინსკის მუსიკის გამო იჩხუბეს — ინფორმაციას Info Imereti ავრცელებს.

მედიის ცნობით, დაცვის პოლიციის წარმომადგენლებს რესტორანში შუფუტინსკის სიმღერის, "უტკის" ჩართვა მოითხოვეს. სხვა მაგიდაზე მსხდომმა კრიმინალური პოლიციის წარმომადგენლებმა დაცვის პოლიციის წარმომადგენლებს მოთხოვნისთვის შენიშვნა მისცეს. უწყების თანამშრომლები ერთმანეთს თავდაპირველად რესტორანში, ხოლო შემდეგ რესტორნის ეზოში ფიზიკურად დაუპირისპირდნენ.

პროკურატურის ინფორმაციით, მომხდართან დაკავშირებით გამოძიება სისხლის სამართლის კოდექსის 126-ე მუხლის პირველი პრიმა ნაწილით მიმდინარეობს, რაც ჯგუფური ძალადობას გულისხმობს.

"ჩატარებული გამოძიებით ამ ეტაპზე დადგენილია, რომ 2026 წლის 19 იანვარს, ტყიბულის მუნიციპალიტეტში მდებარე ერთ-ერთ რესტორანში, საქართველოს შინაგან საქმეთა სამინისტროს თანამშრომელმა და მისმა თანმხლებმა ორმა პირმა, განახორციელეს ჯგუფური ძალადობა და ურთიერთშელაპარაკებისას, სიტყვიერი და ფიზიკური შეურაცხყოფა მიაყენეს ამავე რესტორანში მყოფ შინაგან საქმეთა სამინისტროს დაცვის პოლიციის დეპარტამენტის ორ თანამშრომელს და მათ თანმხლებ პირს," — წერს უწყება.