კრემლის პრესსპიკერის, დმიტრი პესკოვის თქმით, აშშ-მა რუსეთის პრეზიდენტ ვლადიმირ პუტინს ღაზის მშვიდობის საბჭოში გაწევრიანება შესთავაზა. ამის შესახებ ინფორმაცის რუსული მედია ავრცელებს.

პესკოვის თქმით, "პუტინმა დიპლომატიური არხების მეშვეობით მიიღო მოწვევა მშვიდობის საბჭოში გაწევრიანების შესახებ. ჩვენ ვსწავლობთ ამ წინადადების ყველა დეტალს და ვგეგმავთ ამერიკულ მხარესთან კონტაქტს, რათა ყველა ნიუანსი დავაზუსტოთ".

აშშ-ის პრეზიდენტმა დონალდ ტრამპმა მშვიდობის საბჭოს შექმნის შესახებ განცხადება გასული კვირის ბოლოს გააკეთა. საბჭოს თავმჯდომარე თავად ტრამპი იქნება. მის წევრებს შორის არიან სახელმწიფო მდივანი მარკო რუბიო, სპეციალური წარმომადგენელი სტივ უიტკოფი, ინვესტორი ჯარედ კუშნერი, ეროვნული უსაფრთხოების მრჩევლის მოადგილე რობერტ გაბრიელი, ასევე დიდი ბრიტანეთის ყოფილი პრემიერმინისტრი ტონი ბლერი და მსოფლიო ბანკის პრეზიდენტი აჯაი ბანგა.

ორგანიზაციაში გაწევრიანების მოწვევა უკვე გაეგზავნა ეგვიპტის, თურქეთის, ბრაზილიის, არგენტინის, საბერძნეთის, ალბანეთისა და ინდოეთის ლიდერებს. კანადამ, უნგრეთმა და უზბეკეთმა მოწვევა უკვე მიიღეს.

მშვიდობის საბჭოს ფორმირება აშშ-ის ღაზის საკითხის მოგვარების გეგმაში შედის. გასული წლის ნოემბერში ამ გეგმას გაეროს უშიშროების საბჭოს 15 წევრიდან 13-მა დაუჭირა მხარი, მაშინ როდესაც რუსეთმა და ჩინეთმა კენჭისყრაში მონაწილეობისგან თავი შეიკავეს.