აშშ-ის სახელმწიფო მდივანი მარკო რუბიო და სომხეთის საგარეო საქმეთა მინისტრი არარატ მირზოიანი ვაშინგტონში ერთმანეთს შეხვდნენ, რის შემდეგაც საერთაშორისო მშვიდობისა და კეთილდღეობის "ტრამპის მარშრუტის" (Trump Route for International Peace and Prosperity – TRIPP) განხორციელების ჩარჩო დოკუმენტი გამოაქვეყნეს. ეს დოკუმენტი 2025 წლის 8 აგვისტოს თეთრ სახლში აღებული ვალდებულებების შესრულებისკენ გადადგმულ მორიგ ნაბიჯს წარმოადგენს, რომლებიც სამხრეთ კავკასიაში მდგრადი მშვიდობის დამყარებას ისახავს მიზნად. შეერთებული შტატებისა და სომხეთის საერთო განცხადებას აშშ-ის სახდეპი აქვეყნებს.

გავრცელებულ ინფორმაციაში ასევე აღნიშნულია, რომ ჩარჩო დოკუმენტი კონკრეტულ გზას განსაზღვრავს TRIPP-ის პრაქტიკაში განსახორციელებლად და მოსალოდნელია, რომ TRIPP ორმხრივ სარგებელს უზრუნველყოფს როგორც საერთაშორისო, ისე შიდა კავშირგაბმულობისთვის სომხეთის რესპუბლიკაში.

"ჩარჩო დოკუმენტი განსაზღვრავს კონკრეტულ გზას TRIPP-ის პრაქტიკაში განსახორციელებლად. ინიციატივის მიზანია სომხეთის ტერიტორიაზე შეუფერხებელი, მრავალმოდალური სატრანზიტო კავშირის შექმნა. ამ გზით აზერბაიჯანის ძირითადი ტერიტორია და მისი ნახჭევანის ავტონომიური რესპუბლიკა დაკავშირდება, ხოლო პარალელურად მნიშვნელოვანი რგოლი შეიქმნება ტრანსკასპიური სავაჭრო მარშრუტის ფარგლებში. მოსალოდნელია, რომ TRIPP ორმხრივ სარგებელს უზრუნველყოფს როგორც საერთაშორისო, ისე შიდა კავშირგაბმულობისთვის სომხეთის რესპუბლიკაში.

დოკუმენტი იმ პრინციპებს ასახავს, რომლებიც 2025 წლის 8 აგვისტოს ისტორიულ მშვიდობის სამიტზე დადასტურდა, რომელსაც პრეზიდენტმა დონალდ ტრამპმა უმასპინძლა. TRIPP-ის განხორციელების ჩარჩო განსაკუთრებულ ყურადღებას ამახვილებს სუვერენიტეტის, ტერიტორიული მთლიანობისა და ურთიერთსარგებლობის მნიშვნელობაზე, რაც პროექტის საერთო წარმატებისთვის აუცილებელია.

TRIPP-ის საბოლოო მიზანი სომხეთისა და აზერბაიჯანის კეთილდღეობისა და უსაფრთხოების გაძლიერებაა, ასევე ამერიკული ვაჭრობის მხარდაჭერა რეგიონული ვაჭრობისა და კავშირგაბმულობის გაფართოების გზით. ამასთან ერთად, ინიციატივა ახალ სატრანზიტო შესაძლებლობებს შექმნის, რომლებიც ცენტრალურ აზიასა და კასპიის რეგიონს ევროპასთან დააკავშირებს", — წერია გავრცელებულ ინფორმაციაში.

ცნობისთვის, საერთაშორისო მშვიდობისა და კეთილდღეობის ტრამპის მარშრუტი (Trump Route for International Peace and Prosperity — TRIPP), რომელიც უფრო უკეთ უბრალოდ ტრამპის მარშრუტის სახელით არის ცნობილი, აგვისტოში ვაშინგტონში გამართულ სამიტზე გამოცხადდა და მიზნად ისახავს სომხეთის ტერიტორიის გავლით, აზერბაიჯანის მის ექსკლავთან, ნახიჩევანთან დაკავშირებას.