"მითების დეტექტორის" ცნობით, სახელისუფლებო მედია დაპატიმრებული ექსპრემიერის, ირაკლი ღარიბაშვილის ნათესავებს ტროლის მეშვეობით მიმართავს. მათი ცნობით, 13 იანვარს პროსამთავრობო მედიებმა გამოაქვეყნეს ირაკლი ღარიბაშვილის ნათესავებისადმი ექიმ ნათია თოფურიას მიმართვა. პოსტის ავტორი ღარიბაშვილს "კორუმპირებულ ნაძირლად" და "ქვეყნისა და ხალხის მოღალატედ" მოიხსენიებს, ხოლო ნათესავებს მოუწოდებს, ან საჯაროდ განაცხადონ, რომ მათი "ფალავანი" უდანაშაულოა, ან გაჩუმდნენ და მადლობა თქვან, რომ ასეთი მძიმე დანაშაულისთვის მხოლოდ ხუთწლიანი სასჯელი მიიღო. აღსანიშნავია, რომ POSTV News-მა აღნიშნული პოსტი დაასპონსორა კიდეც.

"მითების დეტექტორი" წერს, რომ Nati Topuria-ს ფეისბუქზე მხოლოდ ერთი ფოტო აქვს გამოქვეყნებული, თუმცა სხვა სახელისუფლებო საინფორმაციო სააგენტოების მიერ გავრცელებულ სტატიებში ფოტოზე სრულიად განსხვავებული ადამიანი გვხვდება.

POSTV-ის ვერსიაში გამოყენებული ფოტო "მითების დეტექტორმა" მათე დევიძის საწინააღმდეგო ფეისბუქ კამპანიის დროს გადაამოწმა და დაადგინა, რომ Nati Topuria-ს ანგარიში vk.com-ის მომხმარებლის, Натиа Двали-ის ფოტოს იყენებდა. ანგარიში Nati Topuria 2024 წლის 27 თებერვალს შეიქმნა, აქტიურად პოსტვა კი 2024 წლის მაისში, პროევროპული პროტესტის დისკრედიტაციის მიზნით დაიწყო.

"ნათი თოფურიას" ფეისბუქ გვერდს სასწავლებლად კავკასიის საერთაშორისო უნივერსიტეტი აქვს მითითებული, სამუშაო ადგილად კი — Cebu World-Class RunFest, რომლის გვერდი 2024 წლის 5 დეკემბრამდე Casino hero-სა სახელით იყო რეგისტრირებული და ფილიპინებიდან იმართება. სახელისუფლებო მედიის პოსტებში ნათია თოფურია ექიმად არის მოხსენიებული.

OSINT ინსტრუმენტებით მეორე ფოტოს გადამოწმების შედეგად მსგავსი ვიზუალით კიდევ ერთ პირს მივაკვლიეთ, კერძოდ, რუსული სოციალური ქსელის Vkontakte.ru-ს მომხმარებელს, ქსენია კოვალენკოს.

შეგახსენებთ, რომ 2-გზის ყოფილი პრემიერმინისტრი, თავდაცვისა და შინაგან საქმეთა მინისტრი ირაკლი ღარიბაშვილი 12 იანვარს დააკავეს. პროკურატურის ინფორმაციით, უწყებამ ღარიბაშვილთან საპროცესო შეთანხმება გააფორმა და მას სასჯელის ზომად 5 წლით თავისუფლების აღკვეთა მიესაჯა.