სანამ სომხეთი დღესასწაულებს აღნიშნავდა, პრემიერმინისტრმა ნიკოლ ფაშინიანმა გამოაქვეყნა განცხადება, რომელშიც სომხეთის სამოციქულო ეკლესიის "რეფორმირების" ხედვა წარმოადგინა და კვლავ მოითხოვა კათოლიკოს გარეგინ II-ის გადადგომა. საპასუხოდ ეკლესიამ განაცხადა, რომ რეფორმები არ შეიძლება "თვითგამოცხადებულ საბჭოს" დაევალოს.

ფაშინიანმა განცხადება საკუთარ რეზიდენციაში წაიკითხა, სადაც მან 10 მაღალ იერარქიის სასულიერო პირს უმასპინძლა, რომლებმაც კათოლიკოსის გადადგომა მოითხოვეს.

ფაშინიანის განცხადება საღამოს მის ოფიციალურ სოციალურ ქსელებში გამოქვეყნდა.

დოკუმენტში საუბარია სომხეთის ეკლესიაში რეფორმების დაწყებაზე, გარეგინ II-ის თანამდებობიდან ჩამოშორებასა და, აგრეთვე "საკოორდინაციო საბჭოს" შექმნაზე, რომელიც ხელმომწერებისგან შედგება. ამ საბჭოს რეფორმებთან დაკავშირებული საორგანიზაციო ფუნქციები ექნება.

რეფორმების აუცილებლობა, ავტორების თქმით, განპირობებულია გარეგინ II-ისა და მისი ახლო გარემოცვის "მარცხით — იცხოვრონ და იქადაგონ სახარების პრინციპების შესაბამისად, ასევე სულიერი ცხოვრების დარღვევით და მორალური გახრწნის აშკარა ფაქტების მიმართ შემწყნარებლობის გამოვლენით".

განცხადებაში ასევე დაგმობილია ეკლესიის პოლიტიკაში ჩართვისა და მისი სხვადასხვა დღისწესრიგისა და ინტერესების სამსახურში გამოყენების ის პრაქტიკა, რომელსაც დოკუმენტი მიუღებლად და "არაკანონიკურად" მიიჩნევს.

მთავრობასა და ეკლესიას შორის დაძაბულობამ პიკს 2025 წლის მაისის ბოლოს მიაღწია, როდესაც ფაშინიანმა კათოლიკოს გარგინ II და სხვა მაღალი იერარქიის წარმომადგენლები ცელიბატის აღთქმის დარღვევაში დაადანაშაულა, რაც მისი თქმით, ამ სასულიერო პირებს თანამდებობის დაკავების უფლებას უზღუდავს.

თუმცა ფაშინიანის ყველაზე სერიოზულ ბრალდებად ის არის, რომ გარეგინ II და მისი ძმა — ახალი ნახჭევანისა და რუსეთის ეპარქიის არქიეპისკოპოსი ეზრასი — უცხოურ სადაზვერვო სამსახურებთან კავშირებს ინარჩუნებენ.

იანვრისთვის სხვადასხვა ბრალდებით დაკავებულია ოთხი მაღალი რანგის მღვდელი.

"თვითგამოცხადებული საბჭო"

ორშაბათს შუადღით გავრცელებულ პასუხში ეკლესიამ განაცხადა, რომ ფაშინიანის ინიციატივა ეწინააღმდეგება სომხეთის კონსტიტუციას და ზღუდავს ეკლესიის უფლებებს, რომლებიც დადგენილია როგორც საერთაშორისო დონეზე, ისე სომხეთის კანონმდებლობით.

"ეპისკოპოსების ჩართვა მსგავს ანტიეკლესიურ პროცესებში, ისევე როგორც სასულიერო პირებზე განხორციელებული ზეწოლა, დასაგმობია," — ნათქვამია განცხადებაში.

ეკლესიამ ასევე აღნიშნა, რომ ეს 10 სასულიერო პირი "აგრძელებს შეხვედრებისა და განხილვების თავიდან აცილებას იმ საკითხებზე, რომლებიც მათ აწუხებთ" გარეგინ II-სა და უმაღლეს სასულიერო საბჭოსთან, მიუხედავად იმისა, რომ მათ შეხვედრებზე მიწვევა მიიღეს.

"ხაზგასმით უნდა აღინიშნოს, რომ ეკლესიის კანონიკური საკითხები და რეფორმა ეხება არა თვითგამოცხადებულ კრებას, არამედ სომხური სამოციქულო წმინდა ეკლესიის საპატრიარქოს და მის უმაღლეს მმართველ ორგანოებს", — ნათქვამია განცხადების დასკვნაში.

Facebook-პოსტში, ფაშინიანმა იმ დღეს, როდესაც სომხეთი ტრადიციულად შობას აღნიშნავს, მოსახლეობას ერევანში მსვლელობის ჩატარებისკენ მოუწოდა.

"მსვლელობა იქნება სრულიად მშვიდობიანი და ქრისტიანული სულისკვეთების ერთგული", — განაცხადა ფაშინიანმა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.