ოკუპირებული აფხაზეთის ე.წ. საგარეო საქმეთა მინისტრის მოადგილემ, ოდისეი ბიგვავამ არაკონსტრუქციულად შეაფასა საქართველოს ხელისუფლების მოწოდებები ვენესუელის ხელისუფლებისადმი, გააუქმონ აფხაზეთის აღიარება.

"ქართული პოლიტიკური სპექტრის გარკვეული წარმომადგენლების მცდელობები, საერთაშორისო პროცესები საკუთარი პოლიტიკური მოლოდინების საფუძველზე განმარტონ, ობიექტურად არ ასახავს არსებულ რეგიონულ და საერთაშორისო რეალობას. ე.წ. არაღიარების პოლიტიკის ან იმ სახელმწიფოების გადაწყვეტილებების შესაძლო გადახედვის შესახებ განცხადებებს, რომლებმაც აღიარეს აფხაზეთის დამოუკიდებლობა, არ აქვთ იურიდიული საფუძველი და არ უწყობს ხელს რეგიონში კონსტრუქციული ატმოსფეროს შექმნას", — ბიგვავას კომენტარს რუსული მედია ავრცელებს.

ე.წ. საგარეო საქმეთა მინისტრის მოადგილემ აღნიშნა, რომ "აფხაზეთის რესპუბლიკის დამოუკიდებლობის აღიარება რიგი სახელმწიფოების მიერ, მათ შორის ვენესუელის, ბოლივიის რესპუბლიკის მიერ, წარმოადგენს მათი სუვერენული უფლების განხორციელებას, გაატარონ დამოუკიდებელი საგარეო პოლიტიკა. აფხაზეთის რესპუბლიკა საერთაშორისო აღიარებას არ მიიჩნევს თვითმიზანად", — აცხადებს ბიგვავა.

ბიგვავამ ხაზგასმით აღნიშნა, რომ "აფხაზეთის რესპუბლიკა თანმიმდევრულად იცავს სხვა სახელმწიფოების შიდა საქმეებში ჩაურევლობის პრინციპს და არ აკეთებს კომენტარს საქართველოს შიდა პოლიტიკურ პროცესებზე. ამავდროულად, ჩვენ მზად ვართ, ყურადღებით და პასუხისმგებლობით განვიხილოთ ნებისმიერი სიგნალი, რომელიც მიუთითებს რეგიონული პოლიტიკისადმი უფრო პრაგმატული და რეალისტური მიდგომის სურვილზე", — აღნიშნა ბიგვავამ.

საგარეო საქმეთა მინისტრის მოადგილემ განაცხადა, რომ "აფხაზეთის რესპუბლიკა კიდევ ერთხელ ადასტურებს თავის ერთგულებას მშვიდობიანი თანაარსებობის, კეთილმეზობლობისა და საერთაშორისო სამართლის პატივისცემის პრინციპების მიმართ. ქვეყნის ხელისუფლება ღიაა დაინტერესებულ სახელმწიფოებთან, მათ შორის საქართველოსთან, დიალოგისა და თანამშრომლობის განვითარებისთვის, თანასწორობის, ურთიერთპატივისცემისა და ობიექტურად დადგენილი პოლიტიკური და სამართლებრივი რეალობის აღიარების პრინციპების დაცვით".

ვენესუელა მესამე ქვეყანაა, რომელმაც აღიარა აფხაზეთის დამოუკიდებლობა, რუსეთისა და ნიკარაგუას შემდეგ, რის შემდეგაც ორ ქვეყანას შორის დიპლომატიური ურთიერთობები დამყარდა.

აშშ-ს მიერ ვენესუელის ლიდერის, ნიკოლას მადუროს დაკავების შემდეგ, ოცნების ხელისუფლების საგარეო უწყებამ X-ზე დაწერა, რომ "იმის გათვალისწინებით, რომ ვენესუელის ხელისუფლებამ საერთაშორისო სამართლის უხეში დარღვევით აღიარა საქართველოს ოკუპირებული რეგიონები — აფხაზეთი და ე.წ. სამხრეთ ოსეთი — დამოუკიდებელ სახელმწიფოებად, გამოვთქვამთ იმედს, რომ ბოლო პერიოდში განვითარებული მოვლენები გამოიწვევს ამ უკანონო გადაწყვეტილების გადახედვას".