ოცნების ხელისუფლების საგარეო საქმეთა სამინისტრო ვენესუელის პრეზიდენტ ნიკოლას მადუროს დაკავებას ეხმაურება და წერენ, რომ იმედს გამოთქვამენ ბოლო პერიოდში განვითარებული მოვლენების ფონზე ვენესუელა საქართველოს ოკუპირებული რეგიონების დამოუკიდებელ სახელმწიფოებად აღიარების უკანონო გადაწყვეტილებას გადახედავს.

"ჩვენ ყურადღებით ვაკვირდებით ვენესუელაში მიმდინარე მოვლენებს იმ იმედით, რომ შემდგომი პროცესები განვითარდება ვენესუელელი ხალხის საუკეთესო ინტერესების შესაბამისად. იმის გათვალისწინებით, რომ ვენესუელის ხელისუფლებამ საერთაშორისო სამართლის უხეში დარღვევით აღიარა საქართველოს ოკუპირებული რეგიონები — აფხაზეთი და ე.წ. სამხრეთ ოსეთი — დამოუკიდებელ სახელმწიფოებად, გამოვთქვამთ იმედს, რომ ბოლო პერიოდში განვითარებული მოვლენები გამოიწვევს ამ უკანონო გადაწყვეტილების გადახედვას, საქართველოს ეროვნული ინტერესებისა და საერთაშორისო სამართლის პრინციპების შესაბამისად," — წერს უწყება X-ზე.

შეგახსენებთ, აშშ-ს პრეზიდენტმა დონალდ ტრამპმა განაცხადა, რომ ვენესუელის პრეზიდენტ ნიკოლას მადურო და მისი მეუღლე დააკავეს და ქვეყნიდან ვერტმფრენით გადმოიყვანეს მას შემდეგ, რაც აშშ-მ კარაკასზე "მასშტაბური დარტყმები" დაიწყო. ტრამპმა ამის შესახებ სოციალურ მედიაში შაბათს, 3 იანვარს დაწერა.