ირანში არეულობის დროს რამდენიმე ადამიანი დაიღუპა. ამის შესახებ ინფორმაციას Reuters ადგილობრივ მედიაზე დაყრდნობით ავრცელებს.

Reuters საინფორმაციო სააგენტო Fars-ზე დაყრდნობით წერს, რომ ირანის დასავლეთ პროვინცია ლორესტანში, პოლიციის განყოფილებაზე თავდასხმისას, სამი დემონსტრანტი დაიღუპა და 17 ადამიანი დაშავდა.

"არეულობაში მონაწილეები ხუთშაბათს, დაახლოებით 18:00 საათზე (ადგილობრივი დროით), პოლიციის შტაბში შეიჭრნენ… ისინი პოლიციის ძალებს დაუპირისპირდნენ და ცეცხლი წაუკიდეს რამდენიმე პოლიციის ავტომობილს," — იტყობინება Fars.

Fars-ის ცნობით, ლორდეგანში უსაფრთხოების ძალებსა და, როგორც სააგენტო მათ უწოდებს, "შეიარაღებულ დემონსტრანტებს" შორის შეტაკებებისას ორი ადამიანი დაიღუპა. მანამდე სააგენტო აცხადებდა, რომ დაღუპულთა რიცხვი მეტი იყო. Hengaw-ის განცხადებით, იქ უსაფრთხოების ძალებმა რამდენიმე ადამიანი მოკლეს და დაჭრეს.

რევოლუციურმა გვარდიამ განაცხადა, რომ ქუჰდაშტში მისი დაქვემდებარებული მოხალისე პარამილიტარული ფორმირების — ბასიჯის — ერთი წევრი დაიღუპა და 13 დაიჭრა. მათ პასუხისმგებლობა დემონსტრანტებს დააკისრეს და განაცხადეს, რომ ისინი საპროტესტო ფონით

მოვაჭრეები, მაღაზიის მფლობელები და რამდენიმე ირანული უნივერსიტეტის სტუდენტები უკვე რამდენიმე დღეა დემონსტრაციებს მართავენ და მსხვილ ბაზრობებს კეტავენ. მთავრობამ ოთხშაბათს ქვეყნის დიდი ნაწილი დახურა და სიცივის გამო უქმე დღე გამოაცხადა.

ბოლო წლებში ხელისუფლებამ არაერთხელ ჩაახშო პროტესტები მაღალი ფასების, გვალვის, ქალთა უფლებებისა და პოლიტიკური თავისუფლებების გამო, ხშირად მკაცრი უსაფრთხოების ზომებითა და მასობრივი დაკავებებით.

Reuters-ის ინფორმაციით, ირანის ეკონომიკა წლებია სირთულეებს განიცდის, ძირითადად თეირანის ბირთვულ პროგრამასთან დაკავშირებული აშშ-ისა და დასავლეთის სანქციების გამო. ივნისში ისრაელთან 12-დღიანმა საჰაერო ომმა ქვეყნის ფინანსურ მდგომარეობას დამატებითი დარტყმა მიაყენა.

2025 წელს ირანული რიალი დოლართან მიმართებაში დაახლოებით ორჯერ გაუფასურდა, ხოლო ოფიციალურმა ინფლაციამ დეკემბერში 42.5% შეადგინა.