მოსამართლე არსენ კალატოზიშვილმა სუს-ის ყოფილ უფროსს, გრიგოლ ლილუაშვილს აღკვეთის ღონისძიების სახით პატიმრობა შეუფარდა. გრიგოლ ლილუაშვილი სხდომას არ დასწრებია.

ლილუაშვილის განცხადებაში, რომელიც მისმა ადვოკატმა პროცესზე წაიკითხა, ნათქვამია, რომ ვიდრე "სრულყოფილად არ გავეცნობდა სისხლის სამართლის საქმის მასალებს, სურვილი არ აქვს დაესწროს სასამართლოში პირველ წარდგენილ სხდომას".

"რამდენადაც ვიცი, ბრალდების მხარე მიმართავს სასამართლოს აღკვეთის ღონისძიების საკითხის გადაწყვეტის მიზნით და მომდევნო 24 საათში სასამართლო განიხილავს წარმოდგენილ შუამდგომლობას.

მართალია, საქმის მასალებს ბრალდების მხარე დღეს გადმომცემს, მაგრამ მიმაჩნია, რომ 24 საათში ფიზიკურად მაინც ვერ შევძლებ სისხლის სამართლის საქმის მასალების სრულყოფილად გაცნობას.

ზემოხსენებულიდან გამომდინარე, გამოვხატავ რა დიდ პატივისცემას სასამართლოს მიმართ, ამ ეტაპზე, სანამ სრულყოფილად არ გავიცნობ სისხლის სამართლის საქმის მასალებს, სურვილი არ მაქვს დავესწრო სასამართლოში პირველ წარდგენილ სხდომას, სადაც განიხილება ჩემ მიმართ აღკვეთის ღონისძიების შეფარდების საკითხ", — ნათქვამია ლილუაშვილის განცხადებაში, რომელიც მისმა ადვოკატმა პროცესზე წაიკითხა.

მოსამართლის გადაწყვეტილებით, სუს-ის ყოფილი უფროსის გრიგოლ ლილუაშვილის სასამართლო პროცესი დაიხურა. წინასასამართლო სხდომა 16 თებერვალს, 12:00 საათზე, ჩაინიშნა.

საქმის პროკურორის, მარიამ ბერძენიშვილის თქმით, გამოძიება, დაახლოებით, 2 თვეა მიმდინარეობს და გრიგოლ ლილუაშვილს ამ ეტაპისთვის, გამოძიებისთვის რაიმე სახის ინფორმაცია მოწოდებული არ აქვს".

"კონკრეტული ინფორმაციის საფუძველზე დაიწყო გამოძიება. გამოძიების მიმდინარეობისას გამოიკითხა ათობით პირი. მათ მიერ მოწოდებული და ამოღებული ინფორმაციის საფუძველზე, ეს ინფორმაცია შეიკრიბა, რაც ბრალშია ასახული და შესაბამისად, მას წარედგინა ბრალი", —ამბობს გრიგოლ ლილუაშვილის საქმის პროკურორი, მარიამ ბერძენიშვილი სხდომის დასრულების შემდეგ.

გრიგოლ ლილუაშილი 23 დეკემნერს სუს-ში დაკითხვაზე დაბარების შემდეგ დააკავეს. მას ბრალი საქართველოს სისხლის სამართლის კოდექსის 338-ე მუხლის მე-2 ნაწილის "გ" ქვეპუნქტით და მე-3 ნაწილის "ე" ქვეპუნქტით წარედგინა, რაც წინასწარი შეთანხმებით ჯგუფის მიერ, განსაკუთრებით დიდი ოდენობით ქრთამის აღებას გულისხმობს და სასჯელის სახით 11-დან 15 წლამდე თავისუფლების აღკვეთას ითვალისწინებს.

"საქართველოს გენერალური პროკურატურისა და სახელმწიფო უსაფრთხოების სამსახურის მიერ ერთობლივად ჩატარებული ოპერატიული და საგამოძიებო მოქმედებების შედეგად, დაკავებულია სახელმწიფო უსაფრთხოების სამსახურის ყოფილი უფროსი გრიგოლ ლილუაშვილი, რომელსაც ბრალად ედება ქრთამის აღება ჩვენს წარმოებაში არსებულ რამდენიმე სისხლის სამართლის საქმეში.

პირველი ეპიზოდი: 2022 წლის ოქტომბრის თვეში, მან თურქი ინვესტორი ჩაღათაი ულქერისგან ეკონომიკისა და მდგრადი განვითარების მინისტრის იმჟამინდელი პირველი მოადგილის, რომეო მიქაუტაძის მეშვეობით ქრთამის სახით აიღო 1 მილიონი აშშ დოლარი, რათა მას ლობირება გაეწია ქარის ელექტროსადგურების მშენებლობასთან დაკავშირებულ ურთიერთთანამშრომლობის მემორანდუმის გაფორმებისათვის.

მეორე ეპიზოდი: 2022 წლის თებერვლის თვეში, ამ შემთხვევაშიც რომეო მიქაუტაძის მეშვეობით, კომპანია "ექსპრესსერვისი 2008-ის" დამფუძნებელ გიორგი ხაჟალიას გაზიფიკაციის ტენდერებში დახმარების სანაცვლოდ მოსთხოვა და გამოართვა მილიონ ხუთასი ათასი ლარი.

მესამე ეპიზოდი შეეხება 2021-2023 წლებს, როდესაც მიუხედავად ამ მიმართულებით სახელმწიფოს მიერ დეკლარირებული სამართლებრივი ბრძოლისა, ქვეყანაში მაინც რჩებოდა რამდენიმე ათეული თაღლითური ქოლ-ცენტრი. მოწმეთა ჩვენებებით, აღნიშნული ქოლ-ცენტრებიდან დიდი უმრავლესობა ეკუთვნოდა პირთა ჯგუფს, რომლებიც მიღებული შემოსავლებიდან სხვადასხვა ოპოზიციურ მედიასაშუალებას აფინანსებდნენ, ხოლო ქოლ-ცენტრების შედარებით მცირე ნაწილის ძირითადი მფარველი იყო გრიგოლ ლილუაშვილი, რომელიც ამ საქმიანობას მისი ნათესავის, სანდრო ლილუაშვილის მეშვეობით ახორციელებდა.

აღნიშნული დანაშაულებრივი საქმიანობის შედეგად გრიგოლ ლილუაშვილმა ქრთამის სახით, სანდრო ლილუაშვილის შუამავლობით, დაახლოებით 1 365 000 აშშ დოლარი მიიღო.

საზოგადოებას აქვე ვაცნობებთ, რომ ხსენებული ფაქტობრივი გარემოებებიდან გამომდინარე, გამოძიება დანაშაულებრივ სქემაში ჩართული სხვა პირების მიმართ მტკიცებულებების მოგროვებასთან ერთად ინტენსიურად მუშაობს ვერსიაზე, რომლის მიხედვითაც გრიგოლ ლილუაშვილი სხვა თანამზრახველებთან ერთად უზრუნველყოფდა, რომ არ გამჟღავნებულიყო ოპოზიციური მედიასაშუალებების დამფინანსებელი თაღლითური ქოლ-ცენტრების არსებობა, ხოლო თავის მხრივ ოპოზიციური მედიასაშუალებები არ აშუქებდნენ ინფორმაციას ლილუაშვილის მფარველობის ქვეშ არსებული თაღლითური ქოლ-ცენტრების არსებობის შესახებ, მიუხედავად იმისა, რომ მათ ეს ინფორმაცია გააჩნდათ.

მეოთხე ეპიზოდი: გრიგოლ ლილუაშვილი თავისი თანამდებობრივი მდგომარეობის გამოყენებით, ქრთამის აღების სანაცვლოდ, მფარველობას უწევდა თავის მეგობარს, თბილისის მერიის საბავშვო ბაგა-ბაღების მართვის სააგენტოს ყოფილ დირექტორს, კახა გვანცელაძეს, რომელიც საბავშვო ბაღების მიერ განსახორციელებელი შესყიდვების ხელშეკრულებების გაფორმებაში მეწარმე სუბიექტებისგან ქრთამის სახით განსაკუთრებით დიდი ოდენობის თანხებს, ე.წ. "ატკატებს" იღებდა.

ლილუაშვილი-გვანცელაძის ხსენებულ დანაშაულებრივ სქემაში კახაბერ გვანცელაძეს ჩართული ჰყავდა სააგენტოს ფინანსური აღრიცხვისა და გაანგარიშების, ასევე მონიტორინგის თანამშრომლები. ყველა მათგანის მიმართ გამოტანილია დადგენილება ბრალდებულის სახით სისხლისსამართლებრივ პასუხისგებაში მიცემის შესახებ.

სისხლის სამართლის საქმეზე ჩატარებულია ასეულობით საგამოძიებო მოქმედება, მათ შორის დაკითხულნი არიან მოწმეები, რომელთა ჩვენებებითაც დასტურდება გრიგოლ ლილუაშვილის და სხვათა მიერ დანაშაულის ჩადენის ფაქტი. ასევე ამოღებულია დანაშაულის დამადასტურებელი სხვადასხვა მტკიცებულება, მათ შორის ვიდეო და აუდიოჩანაწერები.

გრიგოლ ლილუაშვილს ბრალი ედება საქართველოს სისხლის სამართლის კოდექსის 338-ე მუხლის მე-2 ნაწილის "გ" ქვეპუნქტით და მე-3 ნაწილის "ე" ქვეპუნქტით, რაც წინასწარი შეთანხმებით ჯგუფის მიერ, განსაკუთრებით დიდი ოდენობით ქრთამის აღებას გულისხმობს და სასჯელის სახით 11-დან 15 წლამდე თავისუფლების აღკვეთას ითვალისწინებს," — განაცხადა გენპროკურორმა გიორგი გვარაკიძემ ბრიფინგზე.