თბილისის მერიის საბავშვო ბაგა-ბაღების მართვის სააგენტოს ყოფილ დირექტორს, კახა გვანცელაძეს ბრალდება დაუსწრებლად წარედგინა. გვანცელაძეს გამოძიება რა მუხლით ედავება ჯერ-ჯერობით უცნობია. ბრალდებულის ადვოკატმა IPN-ს განუცხადა, რომ მისი დაცვის ქვეშ მყოფმა საქართველო დიდი ხნის წინ დატოვა.

შეგახსენებთ, კახა გვანცელაძე ყოფილი სახელმწიფო უსაფრთხოების უფროსის საქმეშიც ფიგურირებს. პროკურატურის განმარტებით, ლილუაშვილს ქრთამის აღების 4 ეპიზოდი ედება ბრალად.

"გრიგოლ ლილუაშვილი თავისი თანამდებობრივი მდგომარეობის გამოყენებით, ქრთამის აღების სანაცვლოდ, მფარველობას უწევდა თავის მეგობარს, თბილისის მერიის საბავშვო ბაგა-ბაღების მართვის სააგენტოს ყოფილ დირექტორს, კახა გვანცელაძეს, რომელიც საბავშვო ბაღების მიერ განსახორციელებელი შესყიდვების ხელშეკრულებების გაფორმებაში მეწარმე სუბიექტებისგან ქრთამის სახით განსაკუთრებით დიდი ოდენობის თანხებს, ე.წ. "ატკატებს" იღებდა.

ლილუაშვილი-გვანცელაძის ხსენებულ დანაშაულებრივ სქემაში კახაბერ გვანცელაძეს ჩართული ჰყავდა სააგენტოს ფინანსური აღრიცხვისა და გაანგარიშების, ასევე მონიტორინგის თანამშრომლები. ყველა მათგანის მიმართ გამოტანილია დადგენილება ბრალდებულის სახით სისხლისსამართლებრივ პასუხისგებაში მიცემის შესახებ," — განაცხადა გენერალურმა პროკურორმა ბრიფინგზე.

შეგახსენებთ, პროკურატურამ ლილუაშვილისთვის აღმკვეთი ღონისძიების სახით პატიმრობას მოითხოვა. მას ბრალი სისხლის სამართლის კოდექსის 338-ე მუხლის მე-2 ნაწილის "გ" ქვეპუნქტით და მე-3 ნაწილის "ე" ქვეპუნქტით შეეფარდა, რაც წინასწარი შეთანხმებით ჯგუფის მიერ, განსაკუთრებით დიდი ოდენობით ქრთამის აღებას გულისხმობს და სასჯელის სახით 11-დან 15 წლამდე თავისუფლების აღკვეთას ითვალისწინებს.