საქართველოს ფინანსთა სამინისტროს საგამოძიებო სამსახურის ინფორმაციით, მათმა თანამშრომლებმა 217 500 ლარის ღირებულების სხვადასხვა დასახელების 75 ათასი კოლოფი უაქციზო სიგარეტი ამოიღეს. უწყების თანამშრომლებმა აქციზური მარკის გარეშე გადაზიდვის ბრალდებით ერთი პირი დააკავეს.

"გამოძიებით დადგინდა, რომ დოკუმენტების თანახმად, აღნიშნულ პირი, საბაჟო - გამშვები პუნქტი ყაზბეგის გავლით, საქართველოდან რუსეთის ფედერაციაში სატვირთო ავტომანქანით ყვავილების ტრანსპორტირებას ახორციელებდა. შემოწმების შედეგად აღმოჩნდა, რომ რეალურად, ბრალდებული, განსაკუთრებით დიდი ოდენობის უაქციზო სიგარეტის გადაზიდვას ცდილობდა", - ამბობენ ფინანსურ პოლიციაში.

საქმეზე გამოძიება საქართველოს სისხლის სამართლის კოდექსის მე-200 მუხლის მესამე ნაწილით მიმდინარეობს. ამ მუხლით, განსაკუთრებით დიდი ოდენობის საქონლის აქციზური მარკის გარეშე გადაზიდვა ისჯება თავისუფლების აღკვეთით ვადით ექვსიდან რვა წლამდე.