რამდენიმე დღეა, ინტერნეტსივრცე ერთმა საშობაო რეკლამამ მოიცვა. სუპერმარკეტების ფრანგულმა ქსელმა Intermarché-მ ახალი სარეკლამო ვიდეორგოლი გამოუშვა, რომელსაც აღფრთოვანებული გამოხმაურება მოჰყვა მსოფლიო მასშტაბით. ორწუთნახევრიანი კლიპი, რომელიც მგლის გარდაქმნის ისტორიას ხელით ნახატი ანიმაციით აცოცხლებს, კრეატიულ სფეროში ფეხმოკიდებულ AI ტრენდსაც უპირისპირდება და ადამიანური შემოქმედებითობის ძალას გვიჩვენებს.

რეკლამის სიუჟეტი სადღესასწაულო სუფრაზე იწყება, სადაც პატარა ბიჭს საჩუქრად მიღებული მგელი შეაშინებს. ბიჭის გასამხნევებლად და შემოსარიგებლად, საჩუქრის ადრესანტი იწყებს ამბის მოყოლას მარტოსულ მგელზე, რომელსაც ტყეში არავინ ემეგობრებოდა: მის გამოჩენაზე ყველა გარბოდა და იმალებოდა. თუმცა, ყველაფერი მაშინ იცვლება, როცა ზღარბის რჩევით მგელი კვების რაციონის შეცვლას და ხილ-ბოსტნეულის მირთმევას გადაწყვეტს. საქმე იქამდე მივა, რომ მგელი საშობაო სუფრაზე სხვა ცხოველებთან ერთად მოილხენს. ვიდეორგოლი კი მგლის სათამაშოსთან ჩახუტებული ბიჭის ჩაძინებით სრულდება... "ყველას გვაქვს მიზეზი, ვიკვებოთ უკეთესად", — ჩნდება წარწერა რეკლამის დასასრულს.

თუმცა, ცხადია, ვიდეორგოლი მხოლოდ უკეთესად კვებისკენ არ მოგვიწოდებს. ფრანგი მომღერლის, კლოდ ფრანსუას, 70-იანი წლების ჰიტით Le mal aimé ("სიყვარულს მოკლებული") გაფორმებული რეკლამა, რომელიც სიმღერის სახელს ატარებს, გვიყვება მეგობრული ურთიერთობების, მიმღებლობისა და გარეგნული მხარის უგულებელყოფის მნიშვნელობაზე — რომ "წიგნი ყდით არ უნდა განსაჯო". თუმცა, ამ ყველაფერთან ერთად, ვიდეორგოლისა და მისი შემქმნელების სათქმელი მეტია: ადამიანური ემოცია მხოლოდ ადამიანური შემოქმედებიდან მოდის.

კლიპზე ფრანგული სარეკლამო სააგენტო Romance, ანიმაციურ კომპანიასთან და საპროდიუსერო სტუდიასთან თანამშრომლობით, თითქმის მთელი წლის განმავლობაში მუშაობდა. პროცესში 80-მდე ადამიანი იყო ჩართული და არცერთ ეტაპზე არ იქნა გამოყენებული გენერაციული ხელოვნური ინტელექტი. ამაზე ხაზგასმა შემქმნელებისთვის მნიშვნელოვანია.

"ხელოვნური ინტელექტი ამბავს ვერ მოჰყვება. ამბებს მხოლოდ ჩვენ ვყვებით", — ამბობს Romance-ის მთავარი ქოფირაითერი, ვიქტორ შევალიე, — "ჩვენი რეკლამა ასეთი წარმატებული იმიტომ გამოდგა, რომ მას საკმაო დრო დავუთმეთ".

სააგენტოს განწყობას იზიარებს დამკვეთიც: Intermarché-ს მფლობელი კომპანიის წარმომადგენლის თქმით, მათი მიზანი იყო, ეჩვენებინათ, რომ "ადამიანურ ინტელექტს რობოტისგან განსხვავებული ემოციის შექმნა შეუძლია".

კომპანიის ეს გადაწყვეტილება დინების თუ არა, ტრენდის წინააღმდეგ წასვლა ნამდვილად არის: კრეატიულ ინდუსტრიაში გენერაციულ ხელოვნურ ინტელექტს უფრო და უფრო ხშირად იყენებენ. მაგალითად, კოკა-კოლამ რამდენიმე კვირის წინ გამოუშვა ახალი საშობაო რეკლამა, რომელიც სწორედ ხელოვნური ინტელექტის მიერაა გენერირებული. ბრენდმა ინტერნეტში მწვავე კრიტიკა დაიმსახურა.

Intermarché-ის რეკლამაზე ასეთი მასშტაბური დადებითი გამოხმაურება კი მოწმობს, რომ AI ტრენდის მიუხედავად, ხალხის დიდი ნაწილი ნამდვილ, ადამიანურ შემოქმედებითობას და ემოციას განსაკუთრებულად აფასებს. ამდენად, ბრენდებისთვის მომხმარებელთან კავშირის დამყარება სწორედ ამ ღირებულებაზე გადის. ეგ კი არა, ინტერნეტმომხმარებლების ნაწილი ახლა ითხოვს, მგლის ისტორია გაგრძელდეს და სრულმეტრაჟიან ანიმაციად იქცეს...