ოცნების პარლამენტმა მესამე, საბოლოო მოსმენით მიიღო "საარჩევნო კოდექსის" ახალი რედაქციის პროექტი, რომელიც ემიგრანტებს უცხოეთში არჩევნებში ხმის მიცემას უზღუდავს.

საკანონმდებლო ცვლილების თანახმად: საზღვარგარეთ მყოფი მოქალაქეები არჩევნებში მონაწილეობას ვერ შეძლებენ, 4 წელიწადში ერთხელ სამშობლოში თუ არ ჩამოვლენ ხმის მისაცემად. თუმცა, ეს საარჩევნო კოდექსში შესატანი ერთადერთი ცვლილება არ არის.

კანონპროექტის მიხედვით, საარჩევნო კოდექსში დაგეგმილი ცვლილებებით:

• იცვლება საარჩევნო კომისიის წევრად არჩევის/დანიშვნის ნორმა — ნასამართლობის მქონე პირი ვერ გახდება საარჩევნო კომისიის წევრი, მათ შორის იმ შემთხვევაშიც, თუ მას სასჯელის სახით მხოლოდ ჯარიმა აქვს შეფარდებული. საარჩევნო კოდექსის ძირითად ტექსტში განისაზღვრება არჩევნებში იმ ამომრჩევლის მონაწილეობის წესი, რომელიც საცხოვრებელი ადგილის მიხედვით რეგისტრაციიდან მოიხსნა, ან რომლის რეგისტრაციაც ძალადაკარგულად გამოცხადდა სააგენტოს გადაწყვეტილებით, ან რომელიც რეგისტრირებულია მისამართის მითითების გარეშე, ან რეგისტრირებულია საზღვარგარეთ

• ზუსტდება ფოტოვიდეოგადაღების წესები: დგინდება, რომ კენჭისყრის შენობაში ყოფნის უფლების მქონე პირს, ასევე საარჩევნო კომისიის სხდომაზე დასწრების უფლების მქონე პირს ფოტოგადაღება შეუძლიათ აუდიო-მონიტორინგის გარეშე.

• იცვლება კენჭისყრის დღეს შენობიდან გაძევების საკითხები: კენჭისყრის შენობიდან გაძევებულ პირს აეკრძალება ყველა სხვა კენჭისყრის შენობაში შესვლა, რისთვისაც საარჩევნო ადმინისტრაცია განახორციელებს შესაბამისი პირების შესახებ მონაცემთა აღრიცხვას;

• იცვლება კანდიდატების რეგისტრაციის პროცედურები – წარსადგენი აღარ იქნება სააღრიცხვო ბარათი. ამჟამად, კანდიდატის რეგისტრაციის მიზნით წარსადგენია მის მიერ შევსებული ორი დოკუმენტი — სააღრიცხვო ბარათი და პარტიული კუთვნილების შესახებ განაცხადი. პროექტის თანახმად, რეგისტრაციის მიზნით კანდიდატი შეავსებს მხოლოდ არჩევნების მონაწილეობის თანხმობის ფორმას, სადაც თანხმობასთან ერთად აღინიშნება ბინადრობის ცენზისა და პარტიული კუთვნილების შესახებ ინფორმაცია;

• იცვლება და ერთგვაროვანი ხდება კანდიდატების წარდგენისა და რეგისტრაციაზე უარის/რეგისტრაციის გაუქმების საფუძვლები. პროექტის თანახმად, პარტია უფლებამოსილი იქნება კანდიდატად წარადგინოს მხოლოდ ამ პარტიის წევრი, ხოლო საინიციატივო ჯგუფი-წარადგენს უპარტიო კანდიდატს. სხვა შემთხვევაში კანდიდატი არ გატარდება რეგისტრაციაში ან რეგისტრირებულ კანდიდატს გაუუქმდება რეგისტრაცია.

• ზუსტდება ზოგიერთი ტერმინის განმარტება, მათ შორის არჩევნების, რეფერენდუმის/პლებისციტის საქართველოს სახელმწიფოს საზღვრებში გამართვის კუთხით;

კანონპროექტის ავტორები და ინიციატორები არიან ოცნების პარლამენტის წევრები: არჩილ გორდულაძე, თორნიკე ჭეიშვილი, ალექსანდრე ტაბატაძე, დავით მათიკაშვილი, რატი იონათამიშვილი, ალუდა ღუდუშაური, თენგიზ შარმანაშვილი, გურამ მაჭარაშვილი, აკაკი ალადაშვილი.

მეტი ახალი რედაქციის "საარჩევნო კოდექსის" პროექტის შესახებ:

• "ოცნების" პარლამენტმა "საქართველოს საარჩევნო კოდექსის" ახალი რედაქცია პირველი მოსმენით მიიღო
• დავით მათიკაშვილი: "[ემიგრანტებისთვის საარჩევნო უფლებებზე] გადაწყვეტილება პოზიტიურია, რომ 4 წელიწადში ერთხელ მოინახულონ სამშობლო"
• "არანაირად არ ხდება საქართველოს მოქალაქეების შეზღუდვა არჩევნებში მონაწილეობასთან დაკავშირებით" — მაკა ბოჭორიშვილი საარჩევნო კოდექსში ცვლილებებზე
• ირაკლი კობახიძე: ემიგრანტების ნახევარი ცხოვრობს რუსეთში, სადაც არ იხსნებოდა საარჩევნო უბნები, გახსენდებათ წუხილი იმასთან დაკავშირებით?
• კიდევ ერთი ნაბიჯი საზოგადოების ტოტალური კონტროლისკენ, როგორც საზღვრებს შიგნით და მის გარეთ! — სალომე ზურაბიშვილი საარჩევნო კოდექსში ცვლილებაზე
• თამთა მიქელაძე: [ემიგრანტები] სახელმწიფოსთვის უკვე მოქალაქეებადაც აღარ მიიჩნევიან, არჩევნებში მონაწილეობა ხომ პოლიტიკური მოქალაქეობის ფუნდამენტური ატრიბუტია?!