ილია თოფურიას წინააღმდეგ ოჯახში ძალადობის ბრალდებების შესახებ ინფორმაციის გავრცელების შემდეგ, მისმა ყოფილმა მეტოქემ ბრაის მიტჩელმა ინსტაგრამზე გამოქვეყნებულ ვიდეოში მებრძოლი მკაცრად გააკრიტიკა.

ილია თოფურიამ ორშაბათს გაავრცელა განცხადება, რომელშიც თქვა, რომ დროებით ტოვებს UFC-ის მსუბუქი წონის ჩემპიონობის დაცვას, რადგან განქორწინების პროცესს გადის და პარალელურად ოჯახში ძალადობის ბრალდებებს უმკლავდება.

"ბოლო რამდენიმე კვირის განმავლობაში რთული გადაწყვეტილება მივიღე, დროებით გადავდო ჩემი ტიტულის დაცვა", — თქვა თოფურიამ განცხადებაში — "ეს არ იყო იოლი გადაწყვეტილება".

"თუმცა, როდესაც ჩნდება გარემოებები, რომლებიც შენს პირად ღირსებას, ოჯახს და რეპუტაციას საფრთხეს უქმნის, დგება მომენტი, როცა მათ უნდა დაუპირისპირდე".

თოფურიამ ძალადობის ბრალდებები უარყო და განაცხადა, რომ მას აშანტაჟებენ. ოჯახში ძალადობის ბრალდებების შესახებ ინფორმაციის გავრცელების შემდეგ, თოფურიას ყოფილმა მეტოქემ ბრაის მიტჩელმა ინსტაგრამზე ვიდეო გამოაქვეყნა და მძაფრად გააკრიტიკა. ვიდეოს მან ასეთი წარწერა დაურთო:

ილია — ცოლზე მოძალადე. რემატჩი მინდა. ლაჩარო.

"გახსოვთ, როცა ილიას ვეჩხუბე, მან მოიგო და შემდეგ სპეცტანსაცმელი ჩაიცვა და დამცინოდა, იმიტომ რომ ფერმა მაქვს და კომბინიზონით დავდივარ? ეს ძალიან სასაცილოდ ეჩვენებოდა", — თქვა მიტჩელმა.

"ახლა კი რაღაც მაქვს შენთვის, ნაბი*ვარო. ამას ეწოდება "ცოლზე მოძალადე" (გულისხმობს უმკლავებო მაისურს, რომელიც ვიდეოში აცვია). დიახ, სწორედ ამისთვის ვიცვამ ამას, ილია თოფურიასთვის. იმ ნაბი*ვრისთვის, რომელიც ქალზე ხელს აღმართავს".

"მე უმამოდ გავიზარდე. არასდროს მინახავს მამაჩემი და არც ვნახავ. და იცი რა? მირჩევნია მამა საერთოდ არ მყოლოდა, ვიდრე მყოლოდა ისეთი, რომელიც დედას სცემდა. ეს სიცოცხლედ დაგიჯდება, შვილო. ეს ხუმრობა არ არის. ამაში არაფერი სასაცილო არ არის და უბრალოდ უნდა გცოდნოდა, რომ ამის გამო სრული ნაბი*ვარი ხარ. შენი ძმაც ნაბი*ვარია. მასაც ვეჩხუბები. და ვცემ. გაგიმართლა, რომ ავად ვიყავი, თორემ შენც გცემდი", — გააგრძელა მიტჩელმა. "შენ არ იმსახურებ შენი შვილების ნახვას, ბიჭო, რადგან მათი დედისთვის ხელის დარტყმა გაბედე. ლაჩარი ხარ. ეს ამაზრზენია".

ამის შემდეგ მიტჩელმა თოფურიას მონანიებისკენ მოუწოდა, ურჩია სმის შეწყვეტა და გააფრთხილა, რომ წინააღმდეგ შემთხვევაში ჯოჯოხეთში აღმოჩნდებოდა. მან ყოფილ ორ წონით კატეგორიაში ჩემპიონს ურთიერთობის შესახებ "რჩევებიც" მისცა.

ამ დროისთვის ილია თოფურიას წინააღმდეგ წაყენებული ბრალდებები დადასტურებული არ არის. ისინი თავად თოფურიას მიერ გახდა საჯარო, თუმცა დეტალები კვლავ გაურკვეველია. უფრო ნათელი სურათი დამატებითი ინფორმაციის გამოქვეყნების შემდეგ გახდება ცნობილი.

ილია თოფურია და ბრაის მიტჩელი ერთმანეთს UFC 282-ზე, 2022 წლის დეკემბერში დაუპირისპირდნენ. თოფურიამ მიტჩელი მეორე რაუნდში დამორჩილებით დაამარცხა.