ახალგაზრდა იურისტთა ასოციაციის ხელმძღვანელი, ნონა ქურდოვანიძე BBC-ის გამოძიებასთან დაკავშირებით სუს-ის მიერ გავრცელებულ განცხადებას ეხმაურება და წერს, რომ "ინტოქსიკაციის მასშტაბების გაზომვა იმ მონაცემებზე დაყრდნობით, რაც გაჟღერდა, არასრულია". ის აქვეყნებს ჯანდაცვის სამინისტროდან თებერვალში მიღებულ წერილს, სადაც წერია, რომ 2024 წლის 28 ნოემბრიდან 2025 წლის 28 იანვრამდე საგანგებო სიტუაციების კოორდინაციებისა და გადაუდებელი დახმარების ცენტრის ბრიგადებმა საპროტესტო აქციებიდან კლინიკებში 207 ადამიანი გადაიყვანეს. ამავე ბრიგადებმა ამავე პერიოდში პოლიციის განყოფილებიდან გადაიყვანეს 18 პირი, დროებითი დაკავების იზოლატორიდან — 16.

"ინტოქსიკაციის მასშტაბების გაზომვა იმ მონაცემებზე დაყრდნობით, რაც გუშინ გაჟღერდა, არასრულია. სუს-ის განცხადებით, ჯანდაცვის სამინისტროს მონაცემებზე დაყრდნობით, სტაციონარულ დაწესებულებებში სამედიცინო ბრიგადების მიერ გადაყვანილი 54 ადამიანიდან მსუბუქი ინტოქსიკაცია დაუდგინდა 5-ს.

საინტერესო დეტალია, რომ ამ მონაცემებში არ შედიან სამედიცინო დაწესებულებებში თვითდინებით მისული პაციენტები. ასეთი რამდენი პირია, ამ დროისათვის უცნობია.
აქვე, ამონარიდი ჯანდაცვის პასუხიდან, რომელიც საია-ს თებერვალში გასცა. აქ საინტერესო დეტალი ისიცაა, რომ კლინიკებში გადაყვანილი დაზიანებული პირების საერთო რაოდენობაც 54-ზე ბევრად მეტი წერია", — წერს ნონა ქურდოვანიძე.

შეგახსენებთ, რომ BBC-იმ 1-ელ დეკემბერს ჟურნალისტური გამოძიება გამოაქვეყნა, სადაც ნათქვამია, რომ ქართულმა ოცნებამ გასული წლის საპროტესტო აქციების დასაშლელად მოქალაქეების წინააღმდეგ პირველი მსოფლიო ომის ქიმიური იარაღი გამოიყენა".

6 დეკემბერს სუს-მა გაავრცელა განცხადება, სადაც ითქვა, რომ საქართველოს შინაგან საქმეთა სამინისტროს "ბრომობენზილ ციანიდი", იგივე "კამიტი" არასდროს შეუძენია.

უწყება წერს, რომ 2024 წლის ნოემბრის შემდგომი დღეების განმავლობაში "სტაციონარულ სამედიცინო დაწესებულებებში გადაყვანილი 54 ადამიანიდან მსუბუქი ინტოქსიკაცია აღენიშნებოდა 5 პირს, რომლებიც მეორე დღესვე გაეწერნენ სამედიცინო კლინიკებიდან."