საქართველოს პრემიერ-მინისტრმა გიორგი კვირიკაშვილმა განაცხადა, რომ გუშინ თბილისის საკრებულოსთან სამართალდამცავებმა კანონის სრული დაცვით იმოქმედეს და "პროვოკატორებს" სხდომის ჩაშლის საშუალება არ მისცეს:

"ოპოზიციის ერთი, რადიკალური ნაწილის მთავარი მიზანია, არჩევნების წინ შექმნან შთაბეჭდილება, თითქოს რაიმე ხელს უშლის სტაბილურად და მშვიდობიანად არჩევნების ჩატარებას, თითქოს მათ აზრის გამოხატვაში ვინმე ხელს უშლის. ვფიქრობ, ეს სიცრუე ყველამ დაინახა".

კვირიკაშვილის თქმით, დედაქალაქისთვის ერთ-ერთი "ყველაზე სტრატეგიული და მნიშვნელოვანი ინვესტიცია" დანაშაულად მონათლეს.

"ათასგვარი სიცრუე მოვისმინეთ გუშინ, დაწყებული იქიდან, რომ სხდომა დახურეს და ამ დროს სხდომის ტრანსლაცია პირდაპირ ეთერში მიმდინარეობდა... ვფიქრობ, ეს სიცრუეც ყველამ დაინახა და დარწმუნებული ვარ, ამ ადამიანების მცდელობას არანაირი პერსპექტივა არ აქვს და ვერ ექნება".

პრემიერის განცხადებებით, "სიცრუისა და მოსახლეობის შეცდომაში შეყვანის ხანა" 2012 წელს დასრულდა.

გუშინ, 10 ოქტომბერს, თბილისის საკრებულომ ივანიშვილთან დაკავშირებული კომპანიებისთვის თბილისის ცენტრში მიწების ერთ ლარად გადაცემის საკითხს მხარი დაუჭირა.

საკრებულოს თავმდჯომარემ, გიორგი ალიბეგაშვილმა განაცხადა, რომ საკრებულოს სხდომაზე დასწრების უფლება მხოლოდ საკრებულოს წევრებსა და მედიას ჰქონდათ. ალიბეგაშვილის თქმით, ამის მიზეზი იყო ოპოზიციის გაცხადებული მიზანი საკრებულოს სხდომის ჩაშლის შესახებ. პოლიციის თანამშრომლებმა, რომლებსაც თბილისის საკრებულოს შენობა ალყაში ჰქონდათ, საქართველოს პარლამენტის დეპუტატები შენობაში არ შეუშვეს, რასაც დაპირისპირება მოჰყვა.

სახალხო დამცველმა განაცხადა, რომ პოლიციელების მიერ შენობაში პარლამენტის წევრებისა და სხვა დაინტერესებული პირების არშეშვება კანონის "უხეში" დარღვევაა.