სულ რამდენიმე წლის წინ თბილისში ყავის კაფეების კულტურა ჯერ კიდევ ნაკლებად იყო გავრცელებული, რჩეული (Specialty) ყავა კი უცხო ხილი. ათი წლის წინ ქალაქის ქუჩები Coffee Lab-ის ახალმოხალული, მომჟავო და ხილოვანი ყავის არომატით აივსო და თბილისშიც ყავის ახალი რიტუალები დამკვიდრდა.

საქართველოს ბანკსა და ყავის ლაბორატორიას თანამშრომლობის დიდი ისტორია აკავშირებს. ჟინის კამპანიამ კი ინოვაციური ბრენდები საერთო იდეის გარშემო გააერთიანა. კარგ ყავაზე, ქოფიშოფ კულტურასა და ჟინზე Coffee Lab-ის დამფუძნებელი გიორგი აივაზიანი გვესაუბრა.

ახალი გემოს ძიებაში

გიორგი წლების განმავლობაში საბანკო სექტორში მუშაობდა და პროფილის შეცვლა უცხოეთში სწავლის დასრულების შემდეგ გადაწყვიტა. საქართველოში დაბრუნებულმა ანტრეპრენერობა გადაწყვიტა და სწავლის პერიოდში ყავის კაფეებში გატარებულმა დრომ ყავის ლაბორატორიის იდეა შთააგონა. რჩეულ (Specialty) ყავამდე ბევრმა კვლევამ და ლონდონის ყავის ფესტივალმა მიიყვანა. მიხვდა, რომ სწორედ ამ გამორჩეული გემოვნური თვისებებისა და ყავის მიმართ სკრუპულოზური მიდგომის გათვალისწინებით უნდა შეექმნა საქართველოში ერთ-ერთი პირველი ყავის კაფეს იდენტობა.

“რაღაც ახლის და გამორჩეულის მიღება გვინდოდა. ისეთი გემოსი, რომელიც ძალიან შეგიყვარდება და შენს ყავის რიტუალს შეცვლის“. — ამბობს გიორგი.

ყავის მზადება როგორც ხელოვნება

ყველაფერი გამორჩეული დიდ შრომასთან და დროსთან ერთად, მოითხოვს ჟინს, რომელიც შენს იდეას ხორცს შეასხამს, თან ზუსტად ისე, როგორც გსურს. ჟინმა გიორგის კომპრომისებზე წასვლის ნება არ მისცა. მან რჩეული (Specialty) ყავის მომზადების ყველა ეტაპი შეისწავლა და დახელოვნდა.

როგორც გიორგი განმარტავს, რაც უფრო ახალმოხალულია ყავა, მით მეტად ინტენსიური და დახვეწილი გემო აქვს. სწორედ ამიტომ, Coffee Lab-ში ყავის მწვანე მარცვლებს გამორჩეული მომწოდებლებისგან იღებენ და თერმულ დამუშავებასაც ადგილზე, თავად ახორციელებენ.

“ჟინიც ხომ ეს არის, არ გაგაჩერებს და ყველაზე მეტად სირთულეების გადალახვის დროს გჭირდება. გადავწყვიტეთ, არ წავსულიყავით არც ერთ კომპრომისზე და ყავის ახალი გემო და მისი დალევის ტრადიცია დაგვეფუძნებინა“.

ახალი ხილი და რჩეული გუნდი

ყავა ხილია და აქვს მომჟავო გემო — ეს ის სიახლე იყო, რომელსაც Coffee Lab-ის აწ უკვე ერთგული მომხმარებელი ეტაპობრივად შეეჩვია. ამ პროცესს, როგორც ხშირად ხდება, თან ახლდა ეჭვები, რისკები და ზოგჯერ განსხვავებული გემოთი უკმაყოფილო სტუმრებიც.

“როგორი პროდუქტიც უნდა აწარმოო, ყველას ვერ მოეწონები, საჭიროა თავად აარჩიო, ვინ ხარ და საკუთარი გზით იარო. ჩვენი გზა საკმაოდ რთული აღმოჩდა, მაგრამ გრძელვადიანმა პერსპექტივამ ცხადყო, რომ მიმართულება ნამდვილად სწორად ავირჩიეთ“.

გემრიელ ყავასთან ერთად Coffee Lab განსაკუთრებულად მხიარული და მეგობრული გუნდით გამოირჩევა, რაც გიორგისთვის ბიზნესის ერთ-ერთი მთავარი მიღწევაა. წარმატებას სწორედ გუნდს უკავშირებს, რომელსაც თავისი საქმე ძალიან უყვარს და გარშემო უკვე შემოკრიბა Coffee Lab-ის ერთგულ მომხმარებელთა კომუნა. იმისთვის, რომ ამ კომუნას მუდამ განსაკუთრებული სიახლეებით გაუმასპინძლდეს, გიორგის გუნდი არ ჩერდება და ყოველ მიღწევას განვითარების ახალი გეგმით აღნიშნავს.

ჟინით სავსე პარტნიორობა

სირთულეებით სავსე გზა გიორგიმ საქართველოს ბანკის დახმარებით გაიარა, რომელიც მის სითამამესა და ჟინს მუდმივად უჭერდა მხარს მოქნილი ფინანსური სერვისებით.

“დღეს კი იდეის მიმართ ერთგულებამ და ფარხმალდაუყრელად სწრაფვამ ერთი კამპანიის ქვეშ გაგვაერთიანა!“

ჟინის კამპანიის ფარგლებში ყავის ლაბორატორიის სტუმრების შემოქმედებით ენერგიაზე, არომატული ყავის გამორჩეულ გემოსთან ერთად, ფინჯნებზე დატანილი ინსპირაციული ფრაზებიც ზრუნავს.

ინოვაციური მიზნებისკენ სვლა იშვიათად არის მარტივი, თუმცა ჟინიანი ადამიანების ისტორიები მოწმობს, რომ თუ არ გაჩერდები, აუცილებლად აღმოაჩენ გზას, რომელიც უნიკალურად შენია!