საქართველოს წიგნის ასოციაცია გამომცემელთა მსოფლიო ასოციაციის (The International Publishers Association — IPA) წევრი გახდა და პირველ წელს საწყისი წევრის სტატუსით ისარგებლებს.

25 ნოემბერს გამართულ გენერალურ ასამბლეაზე IPA-მ ონლაინ არჩევნებისა და წევრობის განაცხადებთან დაკავშირებით გადაწყვეტილების შედეგები წარადგინა.

2026 წლის 1 იანვრიდან გამომცემელთა მსოფლიო ასოციაციას ორი ახალი წევრი: საქართველოს წიგნის ასოციაცია (GBA) და ლატვიის გამომცემელთა ასოციაცია (LPA) შეუერთდება, რომლებსაც საწყისი წევრის სტატუსი მიენიჭათ.

გამომცემელთა მსოფლიო ასოციაციის (IPA) პრეზიდენტი გვანცა ჯობავა სოციალურ ქსელში წერს, რომ ეს მისი "კოლეგების დაუღალავი შრომის შედეგია".

"დაფუძნებიდან 1 წელიც არ გასულა და საქართველოს წიგნის ასოციაციამ არათუ წიგნის პირველი ბაზრობა ჩაატარა შესანიშნავად, არა მხოლოდ საქართველოს კოლექტიური სტენდი წარადგინა ბრწყინვალედ ფრანკფურტში, არამედ გუშინ გამომცემელთა მსოფლიო ასოციაციის ე.წ. საწყისი წევრიც გახდა გენერალურ ასამბლეაზე ონლაინ არჩევნების გზით.

ეს მხოლოდ ჩემი კოლეგების დაუღალავი შრომის შედეგია. მთელი გულით ვულოცავ და მხოლოდ ერთს დავამატებ, საქართველოს წიგნის ასოციაცია, კეთილი იყოს თქვენი მობრძანება დიდ ოჯახში! ღირებულებების დასაცავად და გადასარჩენად ზოგჯერ ყველაფრის ნულიდან დაწყებაც არაფერია!", — წერს სოციალურ ქსელში გამომცემელთა მსოფლიო ასოციაციის (IPA) პრეზიდენტი გვანცა ჯობავა.