დღეს "ოცნების" პარლამენტი ინტერპელაციის წესით ირაკლი კობახიძეს მოუსმენს. ამასთან დაკავშრებით ამოქმედდება "უსაფრთხოების ყვითელი დონე". კითხვები დაისმება უმაღლესი განათლების მიმართულებით დაგეგმილ რეფორმასა და Eagle Hills-ის პროექტთან დაკავშირებით.

პარლამენტის ცნობით, "საქართველოს პარლამენტის სასახლეში უსაფრთხოების დაცვის წესის დამტკიცების თაობაზე" საქართველოს პარლამენტის თავმჯდომარის 2023 წლის 04 სექტემბრის N1/259/23 ბრძანების შესაბამისად, მიმდინარე წლის 26 ნოემბერს, პარლამენტის სასახლეში იმოქმედებს უსაფრთხოების ყვითელი დონე — ვიზიტორებს ეზღუდებათ პარლამენტის სასახლეში შესვლა.

"დაგეგმილ საპარლამენტო ღონისძიებებზე (მათ შორის: კომიტეტების და პლენარულ სხდომებზე) დაიშვებიან მხოლოდ შესაბამისი სტრუქტურული ერთეულების მიერ მოწვეული პირები.

შენობაში დაიშვებიან ტელემაუწყებლების/ტელემედია საშუალებების აკრედიტებული არაუმეტეს სამი ჯგუფი თითო მაუწყებლიდან, საპარლამენტო ღონისძიებების დასრულებამდე.

აღნიშნული ღონისძიების მიზანია საქართველოს პარლამენტის სასახლეში სამუშაო და უსაფრთხო გარემოს უზრუნველყოფა", — ნათქვამია გავრცელებულ ინფორმაციაში.

პარლამენტში ირაკლი კობახიძის მოსმენა 12:00 საათზე დაიწყება.