პოლიციის თანამშრომლები, რომლებსაც თბილისის საკრებულოს შენობა ალყაში აქვთ, საქართველოს პარლამენტის დეპუტატებს შენობაში არ უშვებენ. საკრებულოსთან შეკრებილები არიან ევროპული საქართველოს წევრები.

თბილისის მერობის კანდიდატმა ამავე პარტიიდან, ელენე ხოშტარიამ პოლიციის თანამშრომლებს განუმარტა, რომ საქართველოს კანონით, მას და პარლამენტის სხვა დეპუტატებს თბილისის საკრებულოს სხდომაზე დასწრების უფლება აქვთ.

"მე რომ დაგავალოთ [საკრებულოში არ შეშვება], ხელისუფლებაში რომ მოვალ, არც ეგ არ უნდა შეასრულოთ", - უთხრა ელენე ხოშტარიამ დაცვის სამსახურის წარმომადგენლებს.

ევროპული საქართველოს კიდევ ერთი წევრის, გიგა ბოკერიას თქმით, პოლიციელები კანონის დაცვის ნაცვლად არღვევენ მას.

"ვინ ხართ თქვენ, რომ წყვეტთ პარლამენტის წევრისთვის კანონით გათვალისწინებული უფლების შეზღუდვას. კანონს არღვევთ, სისხლის სამართლებრივ დანაშაულს ჩადიხათ... რატო იტეხავთ ამხელა ამბავს საკუთარ თავზე? ვინც მოგცათ ეგ მითითება, ჩამოუშვით, დაგველაპარაკოს", - უთხრა ბოკერიამ პოლიციის თანამშრომლებმა.

დღეს, 10 ოქტომბერს თბილისის საკრებულო საქართველოს ყოფილი პრემიერ-მინისტრთან და მმართველი პარტიის დამფუძნებლთან, ბიძინა ივანიშვილთან დაკავშირებული ორი კომპანიისთვის მიწის გადაცემის საკითხს განიხილავს. საუბარია ოქროყანის დასახლებაში მდებარე 4 400 მ2 მიწის ნაკვეთისა და პუშკინის ქუჩაზე, "ცეკავშირის" მიმდებარე ტერიტორიაზე არსებული 1 900 მ2 მიწის ნაკვეთის პირდაპირი განკარგვის ფორმით პრივატიზებაზე.

თბილისის საკრებულოს თავმჯდომარის გიორგი ალიბეგაშვილის განცხადებით, საკრებულოს დღევანდელ სხდომას, სადაც ბიძინა ივანიშვილთან დაკავშირებული კომპანიებისთვის მიწების გადაცემის საკითხს კენჭი უნდა უყარონ, მხოლოდ საკრებულოს წევრები და მედია დაესწრება.