ოცნების ხელისუფლების შსს-ს ცნობით, შსს საქართველოს საჯარო სკოლებში პროექტს იწყებს – "პროფესია პოლიციელი", რომლის მიზანიც ახალგაზრდებისთვის საპოლიციო საქმიანობის გაცნობა და მოზარდებში ამ პროფესიის პოპულარიზაციაა.

ოცნების ხელისუფლების შინაგან საქმეთა მინისტრმა გეკა გელაძემ, ოცნების ხელისუფლების განათლების, მეცნიერებისა და ახალგაზრდობის მინისტრ გივი მიქანაძესთან ერთად, ახალი კამპანიის პროექტი სასკოლო საზოგადოებას შსს აკადემიაში წარუდგინა. გეკა გელაძის თქმით, ახალი კამპანია ხელს შეუწყობს, ახალგაზრდებსა და სამართალდამცავი ორგანოს წარმომადგენლებს შორის ნდობაზე დაფუძნებული ურთიერთობის ჩამოყალიბებას.

"სკოლის მოსწავლეებისთვის დაიწყო ძალიან მნიშვნელოვანი პროექტი — "პროფესია პოლიციელი", რომელიც ემსახურება მთავარ მიზანს — ახალგაზრდებმა გაიგონ მეტი შინაგან საქმეთა სამინისტროს საქმიანობის შესახებ.

მათ შესაძლებლობა ექნებათ შინაგან საქმეთა სამინისტროს სხვადასხვა დანაყოფს ეწვიონ და ადგილზე გაეცნონ პოლიციელების მიღწევებს, შედეგებს, წარმატებებსა და ყოველდღიურ საქმიანობას.

ვფიქრობთ, რომ აღნიშნული აქტივობები ხელს შეუწყობს ახალგაზრდების დაინტერესებას პოლიციელის ძალიან ღირსეული და საამაყო პროფესიით", — განაცხადა გეკა გელაძემ.