ოცნების პრემიერი, ირაკლი კობახიძემ სამთავრობო ტელეკომპანია "იმედის" ეთერში და 21 ნოემბერს საქართველოსა და ევროკავშირს შორის ადამიანის უფლებათა დაცვაზე ყოველწლიური დიალოგის გადადებას გამოეხმაურა, რომლის მიზეზად, სავარაუდოდ, საქართველოს დელეგაციაში მყოფი სანქცირებული ოცნების ხელისუფლების შს მინისტრის მოადგილე ალექსანდრე დარახველიძე დასახელდა.

"ისინი [ევროპული ბიუროკრატია] გაურბიან დისკუსიას, გაურბიან მსჯელობას და საბაბებს ეძებენ იმისთვის, რომ ნებისმიერი ტიპის დისკუსია ჩაშალონ. რეალურად საბაბია, როგორ შეიძლება, რომელიღაც თანამდებობის პირის გამო, მე მგონი ეს დასახელდა მიზეზად, ჩაშალო დიალოგი ადამიანის უფლებებთან დაკავშირებით. ჭირივით ეშინიათ დიალოგის, ასეთია მათი დამოკიდებულება. ეს არის საბჭოური მიდგომა, მოქმედებენ, როგორც საკავშირო ხელისუფლება. ადრე საკავშირო ხელისუფლებას უწოდებდნენ საბჭოთა კავშირის ხელისუფლებას და ახლა ევროკავშირის ხელისუფლება წარმოგვიდგება, როგორც საკავშირო ხელისუფლება. არ არის ეს სწორი მიდგომა, ეს არის საბჭოური მიდგომა. საბჭოური მიდგომაც კი იყო ბევრად უფრო პრაგმატული და რაციონალური. ამ შემთხვევაში, ყოველგვარი დისკუსიისგან გაქცევა არის საბჭოურ მიდგომაზე ბევრად უფრო მძიმე რამ, რასაც ჩვენ ვხედავთ", — თქვა ოცნების პრემიერმა, ირაკლი კობახიძემ სამთავრობო ტელეკომპანია "იმედის" ეთერში.