საკონსტიტუციო სასამართლოს ყოფილი თავმჯდომარე და ამ დროისთვის იუსტიციის მინისტრის მოადგილე მერაბ ტურავა KriPoz-ის (კრიმინალური პოლიტიკის ჟურნალის) საერთაშორისო რედაქტორების სიიდან ამოიღეს. ამის შესახებ Tiflis24 წერს.

სტატიაში ვკითხულობთ, რომ რეპრესიულ პოლიტიკაში მონაწილეები "აკადემიური სტატუსითა და "საექსპერტო ავტორიტეტით" საკუთარი თავის ლეგიტიმაციას" ვეღარ შეძლებენ და ტურავას გადაყენება ქართველი იურისტებისთვის მკაფიო სიგნალი უნდა იყოს იმისთვის, რომ დაიკავონ სამართლიანობის მხარე.

"დასკვნა მარტივია: ისინი, ვინც მონაწილეობენ რეპრესიულ პოლიტიკაში და ხელისუფლების მხრიდან სამართლებრივი სახელმწიფო პრინციპების საპირწონედ გამოყენებულ მექანიზმებში, ვეღარ შეძლებენ აკადემიური სტატუსითა და "საექსპერტო ავტორიტეტით" საკუთარი თავის ლეგიტიმაციას.

[...]

ქართველი იურისტებისთვის, ტურავას გადაყენება მკაფიო სიგნალი უნდა იყოს, რომ მათ დაიკავონ კანონისა და სამართლიანობის მხარე", —ვკითხულობთ Tiflis24-ის მიერ გამოქვეყნებულ სტატიაშია.

მოგვიანებით ტურავამ სოციალურ ქსელში აქტივისტ ელენე ქაიხოსროშვილის მიერ გაზიარებულ პოსტს უპასუხა. მან გავრცელებულ ინფორმაციას ცრუ უწოდა და აღნიშნა, რომ განწესებულია "იუსტიციის მინისტრის მოადგილედ, რაც შეუსაბამო იყო ამ ჟურნალის აკადემიურ დამოუკიდებლობასთან."

"ვაი, თქვე უტვინოებო. გარიცხვა კი არა, ჩემთან წინასწარი შეთანხმებით მოხდა შემადგენლობიდან გასვლა, იმის გამო, რომ ამ ეტაპზე აღმასრულებელ ხელისუფლებაში ვარ განწესებული იუსტიციის მინისტრის მოადგილედ, რაც შეუსაბამო იყო ამ ჟურნალის აკადემიურ დამოუკიდებლობასთან. ამის შესახებ იყო წინასწარი წერილობითი მიმოწერა ჩემს კოლეგებთან და შეთანხმება. ტყუილად ნუ გიხარიათ და ავრცელებთ ცრუ ინფორმაციებს", — დაწერა ტურავამ.