შინაგან საქმეთა სამინისტროს ცნობით, ქვემო ქართლის პოლიციის დეპარტამენტის გარდაბნის რაიონული სამმართველოს თანამშრომლებმა, განზრახ მკვლელობის მცდელობისა და ცეცხლსასროლი იარაღის მართლსაწინააღმდეგო შეძენა-შენახვა-ტარების ბრალდებით, ორი პირი დააკავეს.

აღნიშნული დანაშაული 15 წლამდე ვადით თავისუფლების აღკვეთას ითვალისწინებს.

"გამოძიებით დადგინდა, რომ მიმდინარე წლის ოქტომბერში, წარსულში სხვადასხვა დანაშაულისთვის ნასამართლევი, წითელი ცირკულარით ძებნილი, ამჟამად საზღვარგარეთ მყოფი კრიმინალური ავტორიტეტი ელმურაზ მამედოვი, გარდაბნის მუნიციპალიტეტის ერთ-ერთ სოფელში მცხოვრებ ფერმერს — ს.ა.-ს სოციალური ქსელის საშუალებით დაუკავშირდა და ე.წ. "ქურდული სამყაროს" სახელით 200 000 აშშ დოლარის გადახდა მოსთხოვა. მამედოვმა ფერმერს თანხის გადასახდელად სამდღიანი ვადა განუსაზღვრა, წინააღმდეგ შემთხვევაში ოჯახის წევრების ფიზიკური ანგარიშსწორებითა და სიცოცხლის ხელყოფით დაემუქრა", — წერია შსს-ს მიერ გავრცელებულ განცხადებაში.

როგორც უწყების განცხადებაში ვკითხულობთ, სამი დღის შემდეგ, ამავე სოფელში, ს.ა.-ს შვილს, რომელიც ოჯახის კუთვნილი ავტომანქანით გადაადგილდებოდა, ბრალდებულებმა ცეცხლსასროლი იარაღიდან ესროლეს — შედეგად, არავინ დაშავებულა.

სამართალდამცველებმა ცხელ კვალზე დაადგინეს დანაშაულის ჩამდენი პირების ვინაპბა და დააკავეს 1994 წელს დაბადებული თ.ხ. ასევე, წარსულში ნასამართლევი, 2001 წელს დაბადებული ნ.ი. ამასთან, ამავე დანაშაულთან კავშირში მყოფი კიდევ ერთი პირის —1985 წელს დაბადებული შ.მ.-ს მიმართ შსს ძებნას გამოაცხადებს.

შსს-მ კრიმინალურ სამყაროსთან დაკავშირებულ შეკვეთილი მკვლელობის მცდელობაზე 18 წლის პირი დააკავა