შინაგან საქმეთა სამინისტროს ინფორმაციით, უწყების ოპერატიული ღონისძიების შედეგად, შეკვეთილი მკვლელობა აღკვეთეს — დაკავებულია 2007 წელს დაბადებული პირი.

შსს-ს განცხადებით, ბრალდებულს საზღვარგარეთ მყოფი კრიმინალური ავტორიტეტის, ელმურაზ მამედოვის შეკვეთითა და დავალებით, უნდა მოეკლა ლაგოდეხის მუნიციპალიტეტის სოფელ კაბალში მცხოვრები ერთ-ერთი პირი, იმ მოტივით, რომ ამ უკანასკნელმა ელმურაზ მამედოვს უარი განუცხადა დაშინებით მოთხოვნილი ფულადი თანხის — 200 000 ამერიკული დოლარის გადახდაზე. უწყების განცხადებით, ბრალდებულმა დავალება სისრულეში ვერ მოიყვანა — სამართალდამცავებმა შეკვეთილი მკვლელობის მომზადების, ასევე ცეცხლსასროლი იარაღისა და საბრძოლო მასალის უკანონო შეძენა-შენახვა-ტარების ბრალდებით დააკავეს.

"მისი პირადი ჩხრეკის შედეგად, ამოღებულია "მაკაროვის" სისტემის ცეცხლსასროლი იარაღი, მჭიდითა და მასში მოთავსებული ვაზნებით. დაკავებული დანაშაულს აღიარებს. გარდა ამისა, დანაშაულში ბრალდებულის მონაწილეობა დასტურდება მის მიმართ ჩატარებული ფარული საგამოძიებო მოქმედებით, მისი კუთვნილი მობილური ტელეფონის დათვალიერებით და სხვა მტკიცებულებებით," — განაცხადა უწყებამ.

გამოძიება საქართველოს სისხლის სამართლის კოდექსის 18-109-ე და 236-ე
მუხლებით მიმდინარეობს.

უწყებამ დასძინა, რომ ინტერპოლის წითელი ცირკულარით ძებნილი, კრიმინალური ავტორიტეტი ელმურაზ მამედოვის წინააღმდეგ სამართლებრივი დევნა გრძელდება. ელმურაზ მამედოვი, რომელიც უცხოეთში იმყოფება, სხვადასხვა საქმეზე, დაუსწრებლად უკვე წარედგინა არაერთი ბრალი, მათ შორის მიმდინარე წლის ზაფხულში, ლაგოდეხის მუნიციპალიტეტში ჩადენილი შეკვეთილი მკვლელობისათვის.

"დაკავებულთან და კრიმინალურ ავტორიტეტ ელმურაზ მამედოვთან დანაშაულებრივ
კავშირში მყოფი პირების დადგენისა და მათ მიერ ჩადენილი სხვა შესაძლო
დანაშაულების გამოვლენის მიზნით, ოპერატიულ-საგამოძიებო მოქმედებები
გრძელდება.

აქვე, საზოგადოებას შევახსენებთ, რომ კრიმინალური ავტორიტეტის, ელმურაზ
მამედოვის წინააღმდეგ არაერთ სისხლის სამართლის საქმეზე მიმდინარეობს
გამოძიება. მამედოვს ბოლო რამდენიმე თვის განმავლობაში, სხვადასხვა
საქმეზე, დაუსწრებლად უკვე წარედგინა არაერთი ბრალი, მათ შორის მიმდინარე
წლის ზაფხულში, ლაგოდეხის მუნიციპალიტეტში ჩადენილი შეკვეთილი
მკვლელობისათვის.

ინტერპოლის წითელი ცირკულარით ძებნილი, კრიმინალური ავტორიტეტი ელმურაზ
მამედოვი ამჟამად საზღვარგარეთ, მიმალვაში იმყოფება. სამართალდამცავი
უწყებები ინტენსიურ რეჟიმში მუშაობენ მისი დაკავებისა და მართლმსაჯულების
წინაშე დროულად წარდგენის მიზნით, რისთვისაც ხორციელდება ყველა შესაბამისი
საგამოძიებო, საპროცესო და ოპერატიული მოქმედებები," — ვკითხულობთ უწყების განცხადებაში.

ასევე იხილეთ: