გროზნოში, ახლად შექმნილ პუტინის რაიონში, ახალი სასამართლო გაიხსნება, რომელიც რუსეთის პრეზიდენტ ვლადიმერ პუტინის სახელს ატარებს. მისი შექმნის გადაწყვეტილება რუსეთის უზენაესმა სასამართლომ მიიღო.

სასამართლოს პრესსამსახურის განცხადებით, ახალი ორგანოს შექმნა "გროზნოს სასამართლოებში საქმის წარმოების რაოდენობის ზრდასთან" და "მოქალაქეებისთვის მართლმსაჯულებაზე ხელმისაწვდომობის უზრუნველყოფის აუცილებლობასთანაა" დაკავშირებული.

პუტინის რაიონი 2023 წელს ჩეჩნეთის ხელმძღვანელის, რამზან კადიროვის დადგენილებით შეიქმნა. ახალი ადმინისტრაციული ერთეული კონკრეტული ამოცანებით დაარსდა — "მმართველობის ეფექტიანობის გაუმჯობესება" და ქალაქის აღმოსავლეთ ნაწილში "მოსახლეობის ზრდის გათვალისწინება".

ახალი სასამართლო გროზნოს მეხუთე რაიონული სასამართლო იქნება. ამჟამად ქალაქში მოქმედებს ლენინის, ოქტომბრის, ზავოდსკისა და სტაროპრომისლოვსკის სასამართლოები.

პუტინის სახელობის რაიონის პირველი ნაწილი ოქტომბერში გაიხსნა. გახსნის ცერემონიას რამზან კადიროვი და რუსეთის ვიცეპრემიერი ალექსანდრ ნოვაკი ესწრებოდნენ. ღონისძიება სამშაბათს — პუტინის დაბადების დღეზე გაიმართა.

რაიონის საერთო ფართობი 300 ჰექტარს შეადგენს, ხოლო საცხოვრებლად 150000 ადამიანისთვისაა განკუთვნილი.

გახსნის ცერემონიაზე კადიროვმა რაიონი აღწერა, როგორც თანამედროვე საცხოვრებელი კომპლექსი ფართო ქუჩებით, კეთილმოწყობილი ეზოებითა და სოციალური ინფრასტრუქტურით. პროექტის ფარგლებში დაგეგმილია რამდენიმე სკოლის, ორი კულტურის ცენტრის, მედრესეს, მეჩეთის და შშმ პირებისთვის სპორტული კომპლექსის აშენება. კადიროვის თქმით, პროექტი 20000-ზე მეტ სამუშაო ადგილს შექმნის და "მოქალაქეებისთვის კომფორტული ცხოვრების პირობებს" უზრუნველყოფს.

კადიროვმა ასევე განაცხადა, რომ აპირებს თავად პუტინი მოიწვიოს მთელი რაიონის ოფიციალურ გახსნაზე, რომლის მშენებლობის დასრულება 2027 წლისთვის იგეგმება.

თავის მხრივ, ვიცეპრემიერმა ნოვაკმა აღნიშნა, რომ რაიონისთვის პუტინის სახელის წოდება სიმბოლურია. მან გაიხსენა, რომ 2004 წელს პუტინმა, ჩეჩნეთის პირველ პრეზიდენტთან და რამზან კადიროვის მამასთან — ახმად-ჰაჯი კადიროვთან ერთად — მიიღო გადაწყვეტილება გროზნოს აღდგენის შესახებ, იმ მასობრივი ნგრევის შემდეგ, რაც ჩეჩნეთში ორ ომის მოჰყვა. აღდგენის პროცესი დღემდე გრძელდება.

რაიონის მშენებლობა გროზნოს ინფრასტრუქტურის განვითარების პროგრამის ნაწილია. ახალი შენობები ადგილობრივ ვაინახურ არქიტექტურულ სტილში აიგება, რაც, კადიროვის თქმით, ჩეჩნეთის დედაქალაქის ახალი არქიტექტურული სიმბოლო უნდა გახდეს.

პროსამთავრობო მედიასაშუალებების ცნობით, ახალი საცხოვრებელი კომპლექსების მშენებლობაში ადგილობრივი მეწარმეები და ბიზნესსტრუქტურები, რომლებიც პროექტში ერთვებიან სოციალური და საინვესტიციო თანამშრომლობის ფარგლებში. კადიროვის განცხადებით, რაიონი "ბიზნესპროექტს" წარმოადგენს, რომლის მეშვეობითაც ადგილობრივ მეწარმეებს პუტინისადმი მადლიერების გამოხატვა შეუძლიათ.

კადიროვმა სექტემბერში განმარტა, რომ რაიონს პუტინის სახელი "რესპუბლიკის აღდგენისა და მხარდაჭერისთვის მადლიერების ნიშნად" დაერქმევა. 2008 წლიდან გროზნოს ცენტრალური გამზირიც რუსეთის პრეზიდენტის — ვლადიმირ პუტინის სახელით არის ცნობილი.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.