საქართველოს იუსტიციის მინისტრი და უწყებათაშორისი კომისიის თავმჯდომარე, თეა წულუკიანი ამბობს, რომ მასწავლებლებისა და ბაგა-ბაღის თანამშრომლების პოლიტიკური აქტივობებში რიგ შემთხვევაში კანონდარღვევა გამოიკვეთა.

"მთლიანობაში, ჩვენ გვაქვს მშვიდი საარჩევნო კამპანია. ამას მოწმობს საერთაშორისო ორგანიზაციების წინასწარი შეფასებები, ჩვენი, შიდა ეროვნული დამკვირვებლების შეფასებები და მე, როგორც კომისიის თავმჯდომარე, ვისურვებდი, 21 ოქტომბრამდე კიდევ უფრო მაღალი დისციპლინით საჯარო მოხელეებმა დაიცვან ნეიტრალიტეტი, რადგან პოლიტიკური პარტიები უნდა იყოს მკაცრად გამიჯნული მუნიციპალური და ცენტრალური ხელისუფლებისგან და ზოგადად სახელმწიფოსგან",- განაცხადა წულუკიანმა.

ბაგა-ბაღის თანამშრომლების მხრიდან პოლიტიკურ აქტივობაში მონაწილეობაზე ბოლო შემთხვევის შესახებ ინფორმაცია სტუდია მონიტორმა საგამოძიებო მასალა მოამზადა. მასალიდან ირკვეოდა, რომ თბილისის 170-მდე ბაღის ხელმძღვანელს, თითოეულს 100-დან 200-მდე მხარდამჭერთა სიის შედგენა და ბაგა-ბაღების მართვის სააგენტოში მიტანა დაევალა.

გარდა ამისა, იყო შეთხვევა, როცა ქართული ოცნების დროშებით ბავშვებთან ფოტოს გამო, შუახევის მუნიციპალიტეტის სოფელ სხეფის საჯარო სკოლის მასწავლებელი, მარინა დარჩიძე 1 000 ლარით დაჯარიმდა.