თბილისის მერი, კახა კალაძე არჩილ მუსელიანცის საპატიმროდან გამოგზავნილ წერილს ეხმაურება, სადაც ის ციხეში არსებულ პირობებსა და ჰიგიენაზე წერს. კალაძის თქმით, "დღევანდელ ციხეებში საუკეთესო პირობებია".

"ჩვეულებრივი სპეკულაციებია. საპატიმროებს რაც შეეხება, როგორ უნდა გიხაროდეს ვინმეს დაპატიმრება, ან ციხეში ციხეში გაშვება, მაგრამ რაც შეეხება დღევანდელ ციხეებს, საუკეთესო მდგომარეობაა, საუკეთესო პირობები.

არ ვიცი, გაქვთ თუ არა ინფორმაცია, რა ხდებოდა 2012 წლამდე ციხეებში, რა პირობებში იმყოფებოდნენ პატიმრები: არაადამიანური მოპყრობა, არაადამიანური გარემო, სრული კატასტროფა!

ამის კადრები გექნებათ ნანახი. სამწუხარო რეალობა იყო. დარწმუნებული ვარ, პენიტენციური სამსახური ამ ცრუ ბრალდებაზე შესაბამის განცხადებას გააკეთებს", — თქვა კალაძემ.

"ტვ პირველისთვის" გაგზავნილ წერილში არჩილ მუსელიანცი წერს, რომ ამოსვლია "ფაფებში ტომრების ძაფები და თავად ტომრის ნაწილები".

"მსურს საზოგადოებას მივაწოდო სრული ინფორმაცია, რა პირობებში უწევთ ბრლადებულ-მსჯავრდებულებს ყოფნა გლდანის სატუსაღოში.

კვება-წარმოიდგინეთ გლდანში მინიმუმ 4 ათასი პატიმარია და მათთვის საჭიროა საკვების მომზადება დღეში სამჯერ. ყველა შემთხვევაში კერძში კარტოფილი არის მოუხარშავი, უზარმაზარ ნაჭრებად დაჭრილი და ჭუჭყიანი[ ჭიების კვალით]. ავიღოთ მაგალითად ბორში, იგივე კარტოფილი და უზარმაზარ ნაჭრებად დაჭრილი კომბოსტო . ლობიოში მე რამდენჯერმე შემხვდა კენჭი, რამაც კბილი დამიზიანა, ცხადია, ლობიოს არ რეცხავენ და ეგრევე ტომრიდან ქვაბში ყრიან. ასევე წიწიბურა- ისიც გაურეცხავი და კენჭებიანია, ერთხელ ექსპერიმენტი ჩავატარე, წიწიბურას დავასხი ცხელი წყალი და შედეგმა გაამართლა ჩემი მოლოდინი, ჭუჭყიანი წყალი ვიხილე. სოსისი-მოაქვთ გაყინული და ცელოფნის მოშორებისას, რომ ყნოსავ იგივე სუნი აქვს, რაც ქუჩის ძაღლს წვიმის დროს და თუ შეწვავ ამ სოსისს ხდება როგორც ქაღალდი. კვერცხი არ ვიცი საიდან მოქვთ, ან როგორ ახერხებენ ამის კეთებას, მაგრამ როცა კვერცხს ნაჭუჭისგან ასუფთავებენ, საკანში ისეთი სუნი დგება, თითქოს კანალიზაციის ლუქია ახდილი- ეს ფაქტი ჩემთვის ამოუცნობი ფორმულაა. კატლეტი- ვერც შემადგენლობას გაიგებ და ვერც გემოს. ნახევრად უმი, მშრალი ფარში, ხრტილი, მყესი, მოკლედ ხორცის "ატხოდები". თევზი ნახევრად შემწვარი, რომელშიც ასკარიდას მსგავსი დამრგვალებული პატარა ჭიებია. დილის ფაფები- გერკულესი, მანი, ვერმიშელი, პერლოვკა, მე ამომსვლია ამ ფაფებში ტომრების ძაფები და თავად ტომრის ნაწილები. ისეთი შთაბეჭდილება დამრჩა, აქ ხალხი არ იხდის სასჯელს, აქ ვართ პირუტყვი და რომ არა ვალდებულება, საჭმელსაც არავინ გვაჭმევდა. 100 პროცენტიდან 70 არ ჭამს "ბალანდას" და საკვებს მაღაზიაში ყიდულობს", — წერს სინდისის პატიმარი (წერილს "ტვ პირველი ავრცელებს).