თურქეთის პრეზიდენტმა რეჯეფ თაიფ ერდოღანმა განაცხადა, რომ შეერთებულმა შტატებმა და სხვა ქვეყნებმა მეტი უნდა გააკეთონ იმისთვის, რომ ისრაელს ცეცხლის შეწყვეტის შეთანხმების დაცვა აიძულონ — მათ შორის, შესაძლებელია სანქციების გამოყენება ან იარაღის გაყიდვის შეწყვეტა. ამის შესახებ ინფორმაციას Reuters ავრცელებს.

NATO-ს წევრი თურქეთი, რომელიც ხშირად აკრიტიკებს ისრაელის ღაზაზე თავდასხმებს, ოფიციალურად ცეცხლის შეწყვეტის მოლაპარაკებებში შუამავლად ჩაერთო — მანამდე ამ პროცესში არაპირდაპირ მონაწილეობდა. მისი ჩართულობა განსაკუთრებით გაძლიერდა იმ შეხვედრის შემდეგ, რომელიც ერდოღანს გასულ თვეში აშშ-ის პრეზიდენტ დონალდ ტრამპთან ჰქონდა თეთრ სახლში.

"თურქეთიდან ვაკეთებთ ყველაფერს, რომ ცეცხლის შეწყვეტა მოხდეს. ჰამასის მხარე იცავს შეთანხმებას და ამას ღიადაც აცხადებს. ისრაელი კი კვლავ არღვევს ცეცხლის შეწყვეტას," — განაცხადა ერდოღანმა რეგიონული ტურიდან დაბრუნებისას ჟურნალისტებთან საუბარში.

"საერთაშორისო საზოგადოებამ, განსაკუთრებით კი შეერთებულმა შტატებმა, მეტი უნდა გააკეთოს იმისთვის, რომ ისრაელმა სრულად დაიცვას შეთანხმება. ისრაელი უნდა აიძულონ შეასრულოს დაპირებები — სანქციებით ან იარაღის მიწოდების შეჩერებით," — ნათქვამია ფაშინიანის კომენტარში, რომელიც პრეზიდენტის ადმინისტრაციამ გაავრცელა.

Reuters-ის ცნობით, ანკარამ ასევე განაცხადა, რომ შეუერთდება სპეციალურ "სამუშაო ჯგუფს", რომელიც ცეცხლის შეწყვეტის შესრულებას გააკონტროლებს. თურქეთის შეიარაღებული ძალები ამ ჯგუფში შესაძლოა სამხედრო ან სამოქალაქო კუთხით ჩაერთონ. ქვეყანას აქვს სურვილი, აქტიურად მიიღოს მონაწილეობა ღაზის აღდგენაში.

ისრაელის პრემიერმინისტრმა, ბენიამინ ნეთანიაჰუმ მიანიშნა, რომ ღაზის სექტორში თურქული უსაფრთხოების ძალების ჩართვის წინააღმდეგია.

როცა ერდოღანს ნეთანიაჰუს განცხადებებზე ჰკითხეს, მან მისი მკაცრი კრიტიკისგან თავი შეიკავა და ოდნავ შეამსუბუქა წინა განცხადება ღაზაში ჩასვლის მზადყოფნაზე — განმარტა, რომ ამ საკითხზე მოლაპარაკებები კვლავ გრძელდება.

"მოლაპარაკებები გრძელდება იმ სამუშაო ჯგუფზე, რომელიც ღაზაში იმუშავებს. ამ პროცესის დეტალები ჯერ საბოლოოდ განსაზღვრული არ არის. ეს მრავალმხრივი საკითხია და მოლაპარაკებები საკმაოდ კომპლექსურია. ჩვენ მზად ვართ, ღაზას ნებისმიერ ფორმით დავეხმაროთ," — განაცხადა მან.

ერდოღანმა ასევე კვლავ მოუწოდა სპარსეთის ყურის ქვეყნებს, ჩაერთონ ღაზის აღდგენითი სამუშაოების დაფინანსებაში, რადგან მისი თქმით, "ამგვარი ამოცანის შესრულება არც ერთ ქვეყანას მარტო არ შეუძლია".

Reuters-ის ინფორმაციით, ისრაელსა და თურქეთს შორის, რომლებიც წარსულში ახლო მოკავშირეები იყვნენ,ღაზაში მიმდინარე ომის ფონზე, ურთიერთობები მკვეთრად დამძიმდა . ანკარამ ნეთანიაჰუს მთავრობა გენოციდში დაადანაშაულა — ეს ბრალდება, რომელსაც ისრაელი კატეგორიულად უარყოფს.