"ბათუმელებისა" და "ნეტგაზეთის" დამფუძნებელსა და დირექტორს, მზია ამაღლობელს ევროკავშირის ადამიანის უფლებათა უმაღლესი ჯილდო — სახაროვის პრემია გადაეცა. ამაღლობელთან ერთად პრემია ბელარუსელმა ჟურნალისტმა და პოლიტპატიმარმა, ანდჟეი პაჩობუტმა მიიღო.

სახაროვის პრემიის გამარჯვებულები ევროპარლამენტის პრეზიდენტმა, რობერტა მეცოლამ სტრასბურგში, პარლამენტის პლენარულ სხდომაზე დაასახელა.

"ორივე ჟურნალისტი ახლა საპატიმროში იმყოფება ყალბი ბრალდებებით და მხოლოდ იმიტომ, რომ ისინი თავის საქმეს ასრულებდნენ, ლაპარაკობდნენ უსამართლობის შესახებ. მათმა გამბედაობამ ისინი თავისუფლებისა და დემოკრატიის ბრძოლის სიმბოლოდ აქცია. ეს ინსტიტუცია მათი და იმ ხალხის გვერდით დგას, რომლებიც აგრძელებენ თავისუფლების მოთხოვნას," — განაცხადა რობერტა მეცოლამ. (ტექსტი "რადიო თავისუფლება")

სახაროვის პრემია "აზრის თავისუფლებისთვის" 1988 წელს დაარსდა რუსი მეცნიერისა და დისიდენტის, ანდრეი სახაროვის პატივსაცემად. ეს ჯილდო ენიჭებათ იმ ადამიანებსა და ორგანიზაციებს, რომლებიც იბრძვიან ადამიანის უფლებებისა და გამოხატვის თავისუფლების დასაცავად.

წარსულში ლაურეატებს შორის იყვნენ: ნელსონ მანდელა, მალალა იუსაფზაი, ალექსეი ნავალნი, "უკრაინელი ხალხი" და ჯინა მაჰსა ამინი.

2025 წლის დაჯილდოების ცერემონია 16 დეკემბერს სტრასბურგში გაიმართება, ხოლო გამარჯვებულები 50 000 ევროს მიიღებენ.