აზერბაიჯანმა სომხეთთან საქონლის ვაჭრობაზე არსებული ყველა შეზღუდვა მოხსნა — ამის შესახებ აზერბაიჯანის პრეზიდენტმა, ილჰამ ალიევმა, სამშაბათს, ასტანაში, ყაზახეთის პრეზიდენტ ჯომარტ ტოკაევთან ერთობლივ პრესკონფერენციაზე განაცხადა.

ორ ქვეყანას შორის ვაჭრობა ფაქტობრივად ათწლეულების განმავლობაში, საბჭოთა კავშირისგან დამოუკიდებლობის მოპოვების შემდეგ, არ არსებობდა.

ალიევის თქმით, საქონლის პირველი მიწოდება უკვე განხორციელდა — ყაზახური ხორბლის გარკვეული რაოდენობა სომხეთში გაიგზავნა.

"მჯერა, ეს ნათელი ნიშანია იმისა, რომ აზერბაიჯანსა და სომხეთს შორის მშვიდობა მხოლოდ ქაღალდზე კი არა, პრაქტიკაშიც არსებობს," — განაცხადა ალიევმა.

ახალ ამბავს სომხეთში დადებითად შეხვდნენ. პრემიერმინისტრ ნიკოლ ფაშინიანის პრესმდივანმა ნაზელი ბაღდასარიანმა სოციალურ ქსელ ფეისბუქზე დაწერა:

"ეს ნაბიჯი მნიშვნელოვანია რეგიონული [ტრანზიტული გზების] გახსნის, ურთიერთნდობის განმტკიცებისა და მშვიდობის ინსტიტუციონალიზაციის თვალსაზრისით, ვაშინგტონში მიღწეული შეთანხმებების შესაბამისად."

სომხეთის ეკონომიკის მინისტრმა გევორგ პაპოიანმა მოგვიანებით განაცხადა, რომ ხორბალი ყაზახეთის ქალაქ აქტაუდან კასპიის ზღვით იგზავნება ბაქოში, საიდანაც "საქართველოს რკინიგზის" მეშვეობით გადაიტანენ სომხეთში.

"მშვიდობა დადასტურებულია," — დაწერა პაპოიანმა.

იმავე პრესკონფერენციაზე ალიევმა აღნიშნა, რომ "სომხეთსა და აზერბაიჯანს შორის მშვიდობის ახალი ერა დაიწყო".

აგვისტოში ალიევი და ფაშინიანი ვაშინგტონში შეხვდნენ, რომელსაც აშშ-ის პრეზიდენტი დონალდ ტრამპი მასპინძლობდა. შეხვედრაზე მხარეებმა ხელი მოაწერეს სამშვიდობო შეთანხმების წინასწარ ვერსიას, თუმცა ის ჯერ არ გაუფორმებიათ.

მშვიდობის პროცესის ფარგლებში, ქვეყნები ვაჭრობისა და რეგიონული კავშირების აღდგენის მიზნით, ურთიერთობის ნორმალიზებასა და ათწლეულების განმავლობაში ჩაკეტილი საზღვრების გახსნაზე მუშაობენ.

მშვიდობის შეთანხმების ერთ-ერთი ძირითადი ელემენტი "ტრამპის მარშრუტის" (Trump Route for International Peace and Prosperity — TRIPP) შექმნაა — სატრანზიტო გზის პროექტის, რომელიც აზერბაიჯანს მის ექსკლავ ნახიჩევანთან დააკავშირებს სომხეთის ტერიტორიით.

ალიევმა პრესკონფერენციაზე ამ პროექტზეც ისაუბრა და განაცხადა, რომ მარშრუტი 2028 წლის ბოლომდე გაიხსნება. მან მას "ზანგეზურის კორიდორი" უწოდა — ტერმინი, რომელსაც სომხეთი კვლავ ეწინააღმდეგება, რადგან მიიჩნევს, რომ ის სომხეთის სამხრეთ სიუნიქის პროვინციაზე ტერიტორიულ პრეტენზიას გულისხმობს.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.