ქართული ოცნების მიერ ამოქმედებული ახალი კანონების შემდეგ დემონსტრანტების დაკავებას Amnesty International ეხმაურება. Amnesty International-ის დირექტორის მოადგილის, დენის კრივოშეევის განცხადებით, ეს დაკავებები საქართველოში მიმდინარე რეპრესიების კიდევ უფრო გაღრმავებულ ტენდენციას ნათლად აჩვენებს. მისი განმარტებით, დაკავება "უნდა იყოს უკიდურესი საშუალება მხოლოდ მაშინ, როცა პროტესტი ძალადობრივ ხასიათს იღებს."

"ეს დაკავებები ნათლად აჩვენებს საქართველოში მიმდინარე რეპრესიების კიდევ უფრო გაღრმავებულ ტენდენციას. მართალია, სახელმწიფოს შეუძლია დააწესოს გარკვეული შეზღუდვები საჯარო წესრიგის უზრუნველსაყოფად, მაგრამ ახალმა ცვლილებებმა მნიშვნელოვნად გადააჭარბა იმ ფარგლებს, რაც საერთაშორისო ადამიანის უფლებათა სამართლის მიხედვით დასაშვებია. მშვიდობიანმა შეკრებებმა შესაძლოა დროებით შექმნას დისკომფორტი ან შეაფერხოს ტრანსპორტი, თუმცა ეს არ ამართლებს დემონსტრაციის ძალადობრივ დაშლას ან მონაწილეთა დაკავებას — ეს ზომა უნდა იყოს უკიდურესი საშუალება მხოლოდ მაშინ, როცა პროტესტი ძალადობრივ ხასიათს იღებს", — განაცხადა კრივოშეევმა.

კრივოშეევის განცხადებით, "საქართველოს ხელისუფლება აშკარად ცდილობს, შიშისა და დასჯის მეშვეობით დაადუმოს მშვიდობიანი მომიტინგეები" და აუცილებელია დაკავებულები დაუყოვნებლივ გათავისუფლდნენ.

"საქართველოს ხელისუფლება აშკარად ცდილობს, შიშისა და დასჯის მეშვეობით დაადუმოს მშვიდობიანი მომიტინგეები. აუცილებელია დაუყოვნებლივ გათავისუფლდნენ ყველა ის პირი, რომლებიც მხოლოდ გამოხატვისა და მშვიდობიანი შეკრების უფლების განხორციელების გამო არიან დაკავებულნი," — აღნიშნა კრივოშეევმა.