2025 წლის 19 ოქტომბერს, სასტუმრო პულმანში, ალიანსის ორგანიზებით ჩატარდება პირველი აკრედიტებული სამეცნიერო კონფერენცია გინეკოლოგიისა და უროლოგიის სფეროში, თემაზე: მიკრობიოტის როლი სქესობრივ და რეპროდუქციულ ჯანმრთელობაში.

ღონისძიება მიზნად ისახავს თანამედროვე სამედიცინო ცოდნისა და კვლევების გაზიარებას, დაავადებების პრევენციის მნიშვნელობის წარმოჩენას და ქართველი ექიმებისთვის უწყვეტი პროფესიული განვითარების შესაძლებლობის გაძლიერებას.

კონფერენციის მომხსენებლები იქნებიან საქართველოსა და თურქეთის წამყვანი სპეციალისტები:

  • პროფ. მადონა ჯუღელი — მეან-გინეკოლოგი, მედიცინის მეცნიერებათა დოქტორი, საქართველოს კოლპოსკოპიის ფედერაციის პრეზიდენტი, კარაპს მედლაინის საშვილოსნოს ყელის პათოლოგიის პროფილაქტიკისა და მკურნალობის განყოფილების გამგე;
  • პროფ. მაკა გეგეჭკორი — მეან-გინეკოლოგი, რეპროდუქტოლოგი, თბილისის სახელმწიფო სამედიცინო უნივერსიტეტის პროფესორი, ზურაბ საბახტარაშვილის რეპროდუქციული კლინიკის სასწავლო-სამეცნიერო მიმართულების ხელმძღვანელი;
  • დოქტ. ალექსანდრე ხელაია — უროლოგი, ანდროლოგი, საქართველოს უროლოგიის ეროვნული ცენტრისა და მედ დიაგნოსტიკის ექიმი;
  • დოქტ. ნატო შამუგია — მედიცინის მეცნიერებათა აკადემიური კანდიდატი, GGRC-ის მთავარი ექიმი მეან-გინეკოლოგი;
  • პროფ. ნიკოლოზ (ნუკრი) კინტრაია — მეან-გინეკოლოგი, მედიცინის მეცნიერებათა დოქტორი, პროფესორი.

საერთაშორისო სტუმრებს შორის იქნებიან ანკარის საუნივერსიტეტო კლინიკის KORU-ს წამყვანი სპეციალისტები:

  • პროფ. აიდარ ბირი — გინეკოლოგი;
  • პროფ. აინურ უგურ ბილგინი — ჰემატოლოგი;
  • ასოც. პროფესორი ბურაკ კორპუ — უროლოგი.
  • ასევე, ღონისძიებაში მონაწილეობას მიიღებს 100-ზე მეტი ქართველი გინეკოლოგი, რეპროდუქტოლოგი და უროლოგი. მონაწილეებს კონფერენციის დასრულების შემდეგ გადაეცემათ სერტიფიკატები და უწყვეტი პროფესიული განვითარების კრედიტქულები.

ალიანსი პრევენციული ჯანდაცვისთვის შეიქმნა 2024 წელს და აერთიანებს საქართველოსა და მის ფარგლებს გარეთ მოღვაწე სხვადასხვა დარგის ქართველ ექიმებს. ორგანიზაციის მთავარი მიზანია პრევენციული მედიცინის პრინციპების პოპულარიზაცია, ექიმთა პროფესიული განვითარების ხელშეწყობა და ინოვაციური მიდგომების დანერგვა ქართულ სამედიცინო სივრცეში.

სამეცნიერო კონფერენციის გენერალური სპონსორი — ფარმაცევტული კომპანია სმარტფარმი საქართველოს ბაზარზეა 2012 წლიდან და ერთ-ერთი მსხვილი იმპორტიორი და საბითუმო დისტრიბუტორია საქართველოში, რომელიც ამარაგებს 1000-დე აფთიაქს ხარისხიანი და ხელმისაწვდომი მედიკამენტებით.