სამხრეთ მექსიკაში მასწავლებლების პროტესტის დროს პოლიციასთან დაპირისპირებას 6 ადამიანის სიცოცხლე შეეწირა.

BBC-ის ინფორმაციით, 100-ზე მეტი ადამიანი დაშავდა, მათ შორის არიან პოლიციელებიც.

პროტესტი წინა კვირას, კორუფციის ბრალდებით მასწავლებელთა კავშირ CNTE-ის 2 ლიდერის დაკავებას მოჰყვა.

ხელისუფლების განცხადებით, პოლიცია ბლოკირებული ქუჩების გაწმენდას ცდილობდა, როდესაც უცნობმა შეიარაღებულმა პირმა, ქაოსისა და კონფლიქტის შექმნის მიზნით, ორივე მიმართულებით სროლა დაიწყო.

მექსიკის ეროვნული უსაფრთხოების კომისიის განცხადებაში ნათქვამია, რომ მიმდებარე ტეროტორიაზე მყოფი პოლიციელები არ იყვნენ შეიარაღებულნი.

მოგვიანებით კი, ფედერალური პოლიციის უფროსმა ენრიკე გალინდომ თქვა, რომ შეიარაღებული ძალები მას შემდეგ გამოჩდნენ ინციდენტის ადგილას, რაც უცნობმა ადამიანებმა, რომლებიც დემონსტრაციასთან არ იყვნენ დაკავშირებულნი, პოლიციისა და დემონსტრანტების მიმართულებით სროლა განახორციელეს.

CNTE-ის კავშირის წევრები, 2013 წელს, პრეზიდენტ ენრიკე პენას წარდგენილ განათლების სისტემის რეფორმებს უპირისპირდებოდნენ.

ცვლილებებს შორისაა მასწავლებელთა საქმიანობის შეფასების ახალი კრიტერიუმები.

გაერთიანების წევრები ამბობენ, რომ კორუფციული ბრალდებები მათი ლიდერების წინააღმდეგ პოლიტიკურადაა მოტივირებული.

რუბენ ნუნეზი ბრალდებულია გაერთიანების წევრებისგან ფულის უკანონოდ შეგროვებაში. პროკურორები მას „ფულის გათეთრებაშიც“ ადანაშაულებენ.