GEM Fes-ის ორგანიზატორიs, გიორგი სიგუას განცხადებით, თუ სახელმწიფო ბიუჯეტიდან ფესტივალი აღარ დაფინანსდება, ორგანიზატორებს საქმეს გაუმარტივებს. ამის შესახებ მან ფეისბუკზე დაწერა.

მისივე თქმით, ამით ისინი აცდებიან იმ ბევრ პრობლემას, რომელიც 32-დღიან ნონ სტოპ ფესტივალის გაკეთებას მოჰყვება:

"მოგვიწევს მასშტაბების შემცირება, მოძიებული რესურსებით შედარებით მცირე პროექტის დაგეგმვა (მაგალითად სამ- ან ოთხდღიანი) და ისე ჩატარება... ასე რომ, GEM Fest ნებისმიერ შემთხვევაში დაიგეგმება და გაკეთდება, ექნება მას საბიუჯეტო თანადაფინანსება თუ არა".

სიგუას თქმით, 2015 წელს ელექტრონული მუსიკის ფესტივალი კერძო ინვესტიციით ჩამოყალიბდა, ხოლო 2016 წელს Check in Georgia-ს ფარგლებში, როგორც ბევრმა სხვა პროექტმა, მათაც მიიღეს სახელმწიფოს დახმარება.

გუშინ, 5 ოქტომბერს ეკონომიკის მინისტრმა, გიორგი გახარიამ განაცხადა, რომ ანაკლიის ელექტრონული მუსიკის ფესტივალი GEM Fest სახელმწიფო ბიუჯეტიდან არ უნდა დაფინანსდეს.

2017 წელს ბიუჯეტმა ელექტრონული მუსიკის ფესტივალი 2 მილიონი ლარით დააფინანსა. ფესტივალი ერთი თვის განმავლობაში, 14 ივლისიდან 14 აგვისტომდე გაგრძელდა.

ფესტივალის ორგანიზატორის, გიორგი სიგუას თქმით, GEM Fest ფინანსურად შემოსავლიანი არ გამოდგა, რაც მისი მცდარი წარმოდგენების შედეგია. მისი თქმით, კვებისა და სავაჭრო ობიექტები ვერ უხდიდნენ იჯარის ფულს იმიტომ, რომ არ ჰქონდათ მუშაობა. ამ მიზეზით ვერც GEM Fest-ის ორგანიზატორები იხდიდნენ ქვეყნის შიგნით და გარეთ არსებულ ფინანსურ დავალიანებას.