სახალხო დამცველი შპს "რეფორმერ ფიტნესის" მიერ საჯაროდ გავრცელებულ ინფორმაციას ეხმიანება და "აცხადებს, რომ საქართველოში აკრძალულია ნებისმიერი ნიშნით დისკრიმინაცია, ხოლო საქართველოს სახალხო დამცველი, როგორც დისკრიმინაციის აღმოფხვრაზე ზედამხედველი ინსტიტუტი, ყველა იმ პირის განცხადებას შეისწავლის, ვინც თავს დისკრიმინაციის მსხვერპლად მიიჩნევს. ამასთან, საქმის სრულყოფილად შესწავლის პროცესში აპარატი ახდენს მოპასუხის ინფორმირებას და გამოითხოვს რელევანტურ ინფორმაციას", — ნათქვამია სახალხო დამცველის მიერ გავრცელებულ ინფორმაციაში.

19 სექტემბერს ოკუპანტი ქვეყნის წარმომადგენელმა, ფიოდოროვ ალექსანდრე ალექსანდროვიჩმა სახალახო დამცველს, ლევან იოსელიანს საჩივრით მიმართა, სადაც წერდა, რომ "რეფორმერ ფიტნესს" მომსახურების შესაძენად ეწვია, თუმცა უარი უთხრეს. ლევან იოსელიანი გიორგი ფუტკარაძეს საჩივართან დაკავშირებით პოზიციის დაფიქსირებას 10 დღის ვადაში სთხოვს.

ლევან იოსელიანის მიმართვის საპასუხოდ "რეფორმერ ფიტნესის" დირექტორმა გიორგი ფუტკარაძემ დაწერა, რომ "ოკუპანტი ქვეყნის მოქალაქეებს, რომლებიც საქართველოს სტუმრობენ არ მოემსახურებიან, თუკი ისინი წერილობით არ დაადასტურებენ პატივისცემას ჩვენი და უკრაინის სუვერენიტეტის მიმართ".