ოცნების პრემიერმინისტრის, ირაკლი კობახიძის განცხადებით, "მეთოდური მიდგომებით" პასუხს აგებინებს ყველა იმ ადამიანს, რომელიც "4 მილიონ ადამიანზე ძალადობს". მან ისიც თქვა, რომ ეს ადამიანები, რომლებიც "უცხოური აგენტები" არიან ნულ თანაგრძნობას იმსახურებენ.

"50-100 კაცი, რომელიც კეტავს ქუჩას, ძალადობს 4 მილიონ ადამიანზე, რომელთაც უნდათ მშვიდობა და სიწყნარე ამ ქვეყანაში, წინსვლა და განვითარება, ხომ შეუძლებელია, რომ ასე გაგრძელდეს და ეს დავუშვათ.

ჩვენი მეთოდური მიდგომებით ყველა დაელოდოს, როგორ გაგრძელდება პროცესები. ნული თანაგრძნობა — ამას იმსახურებენ ეს ადამიანები. უცხოური აგენტები ვერ დაიმსახურებენ ვერავითარ თანაგრძნობას სახელმწიფოს წარმომადგენლების მხრიდან. კანონის ჩარჩოებში და ფარგლებში ისინი მიიღებენ პასუხს იმ ძალადობაზე, რომელსაც ისინი სჩადიან 4 მილიონ ადამიანის წინააღმდეგ ამ ქვეყანაში," — განაცხადა კობახიძემ "რუსთავი 2-ს" ეთერში.

კობახიძის განცხადებით, შეიძლება შეკრებაც შეიზღუდოს, რადგან "კანონში რა ლოგიკაა და ადამიანის უფლებების სტანდარტებში რა ლოგიკაა — შენ საკმარისად თუ არ ხარ შეკრებილი რომ ქუჩა გადაკეტო".

"კანონში რა ლოგიკაა და ადამიანის უფლებების სტანდარტებში რა ლოგიკაა — შენ საკმარისად თუ არ ხარ შეკრებილი რომ ქუჩა გადაკეტო, პატივი უნდა სცე შენს თანამოქალაქეს, რომელსაც უნდა, რომ შეუფერხებლად გაიაროს ამ ქუჩაზე. ელემენტარული პატივისცემის ამბავია და ამას ეფუძნება ადამიანის უფლებების სტანდარტები, მაგრამ არა, 100-მა კაცმა უნდა იძალადოს ათასობით და მილიონობით ადამიანზე. ჩვენი მეთოდური მიდგომით, ეს ადამიანები მიიღებენ პასუხს იმ ერთწლიან 100-კაციან ძალადობაზე, რომელსაც ისინი ჩადიან 4 მილიონი ადამიანის წინააღმდეგ, საქართველო ეროვნული ინტერესების წინააღმდეგ და ჩვენი ეკონომიკის წინააღმდეგ," — თქვა კობახიძემ.