გვიან ღამით "გირჩი — მეტი თავისუფლების" წევრი გელა ხასაია დააკავეს. ამის შესახებ თავდაპირველად ინფორმაცია მისმა თანაპარტიელმა ანა ყურაშვილმა გაავრცელა.

"გელა ხასაია დააკავეს 2-3 საათის წინ, ამ დროისთვის მეტი არაფერი ვიცით. დიღმის მესამე სამმართველოში გადმოიყვანეს რამდენიმე წუთის წინ. როგორც კი ადვოკატი შევა, დავწერ დამატებით ინფორმაციას", — დაწერა ყურაშვილმა.

მოგვიანებით გაავრცელა ინფორმაცია, რომ გელა ხასაიას ადვოკატმა მოინახულა და საქმე ეხება "ერთი თვის წინ მის სახლთან ახლოს მომხდარ შელაპარაკებას, რომლის თანამონაწილეც გელა არ ყოფილა".

"გელა ნახა ადვოკატმა, კარგად არის, ბრალი არ აქვს წარდგენილი, ვითარება ეხება ერთი თვის წინ მის სახლთან ახლოს მომხდარ შელაპარაკებას, რომლის თანამონაწილეც გელა არ ყოფილა, მეტი დეტალი გვეცოდინება ხვალ დილით", — წერს ანა ყურაშვილი.

გელა ხასაიას ადვოკატი ომარ ფურცელიძე აცხადებს, რომ ბრალის დადგენილება ჯერ არ მიუღიათ და რა მუხლს ედავებიან გელა ხასაიას მას შემდეგ გაიგებენ, რაც გამოძიება დაცვის მხარეს საქმის მასალებს გადასცემს.

ომარ ფურცელაძის თქმით, რომლის კომენტარსაც "ტაბულა" ავრცელებს, "შემთხვევა არის მინიმუმ 1 თვის ხანდაზმულობის, საუბარია გარკვეული ტიპის კონფლიქტზე, რომლის მონაწილეც გელა ხასაია არ ყოფილა არავითარ შემთხვევაში, თეორიულად იგი შეიძლება იყოს ადამიანი, რომელიც შესაძლოა, რაიმე ინფორმაციას ფლობდა ამ ფაქტთან დაკავშირებით".

"ამ ეტაპზე გამომძიებლის ზეპირსიტყვიერი შეტყობინებით და იმით, თუ რა უთხრეს გელას უშუალოდ საგამოძიებო უწყებაში, ვიცით, რომ სავარაუდოდ, გამოძიება უნდა მიმდინარეობდეს 120-ე მუხლის მეორე ნაწილით. თუმცა, მუხლის შინაარსიდან გამომდინარე, რაც ითვალისწინებს ჯანმრთელობის მსუბუქ დაზიანებას იმ პირის მიერ, ვინც ნასამართლევია ჯანმრთელობის დაზიანებისთვის ან და სხვა მძიმე დანაშაულისთვის, ცხადი და ერთმნიშვნელოვანია, რომ გელა ხასაიასთან ეს მუხლი რელევანტური არ არის.

შესაბამისად, დიდი ალბათობით, ზეპირად გაჟღერებული მონაცემები და ბრალის დადგენილებაში ფაქტობრივად ასახული ბრალდება ვერ დაემთხვევა, თუმცა, იქამდე, სანამ გადმოგვეცემა, ბუნებრივია, დაზუსტებით ვერ ვიძახით.

შემთხვევა არის მინიმუმ 1 თვის ხანდაზმულობის, საუბარია გარკვეული ტიპის კონფლიქტზე, რომლის მონაწილეც გელა ხასაია არ ყოფილა არავითარ შემთხვევაში, თეორიულად იგი შეიძლება იყოს ადამიანი, რომელიც შესაძლოა, რაიმე ინფორმაციას ფლობდა ამ ფაქტთან დაკავშირებით.

ამ ყველაფრის გათვალისწინებით, გელასთან კომუნიკაციით, იმ ყველაფრის გათვალისწინებით, რაც გელამ მოისმინა პოლიციაში თანამშრომლებისგან, ვვარაუდობთ, რომ მოსალოდნელი ბრალი შეიძლება იყოს მათ შორის გარკვეული ტიპის დანაშაულის შეუტყობინებლობა. ის, რომ თვითონ არ ყოფილა არავითარი კონფლიქტის მონაწილე, ეს ცხადი და ერთნიშვნელოვანია, ამის დადასტურება იქნება შეუძლებელი.

სავარაუდოდ, საუბარი უნდა იყოს, ზეპირსიტყვიერი განმარტებიდან გამოვდივართ ისევ, პირველ სექტემბერს სადგურის მოედნის მიმდებარედ მომხდარ ფაქტთან დაკავშირებით, სადაც გელასთვის უცნობი პირები სიტყვიერად დაუპირისპირდნენ ერთმანეთს და ამ ფაქტის მონაწილე, ერთ-ერთი შემსწრე იყო გელა ხასაია," — ამბობს ფურცელაძე.