დააკავეს კაცი, რომელმაც გამოძიების ცნობით, ყოფილ ცოლს ცივი იარაღით გულ-მკერდის არეში დაზიანებები მიაყენა, მისი ბენზინით დაწვა სცადა და ადგილიდან მიიმალა. შინაგან საქმეთა სამინისტროს ინფორმაციით, დაჭრილი 34 წლის ქალი კლინიკაშია მოთავსებული.

უწყების ცნობით, დაკავებული კაცი 43 წლისაა და ის წარსულში ნასამართლევია.

"წარსულში ნასამართლევი, 1982 წელს დაბადებული ზ.ბ. ოჯახის წევრის მიმართ, დამამძიმებელ გარემოებაში ჩადენილი განზრახ მკვლელობის მცდელობის ბრალდებით დააკავეს. დანაშაული 20 წლამდე ვადით თავისუფლების აღკვეთას ითვალისწინებს.

გამოძიებით დადგინდა, რომ დანაშაულში ბრალდებულმა პირმა წარსულში არსებული კონფლიქტის ნიადაგზე ცივი იარაღით გულ-მკერდის არეში დაზიანებები მიაყენა ყოფილ მეუღლეს, 1991 წელს დაბადებულ თ.ლ.-ს, რის შემდეგაც ბენზინის შესხმით მის დაწვას შეეცადა. მომხდარის შემდეგ, ზ.ბ. შემთხვევის ადგილიდან მიიმალა. დაჭრილი პირი სამედიცინო კლინიკაშია მოთავსებული," — აღნიშნულია ინფორმაციაში.

უწყების ცნობით, გამოძიება სისხლის სამართლის კოდექსის 19-109-ე მუხლით მიმდინარეობს.