"ანტიკორუფციულმა ბიურომ პლატფორმა "სალამის" წინააღმდეგ რეპრესიული კანონის ამოქმედება დაიწყო" — ამის შესახებ ორგანიზაცია გუშინ, 25 სექტემბერს გავრცელებულ განცხადებაში წერს და აღნიშნავს, რომ რაჟდენ კუპრაშვილის უწყება მათგან "გარკვეული სახის მოცულობითი და დეტალური ინფორმაციის მიწოდებას" ითხოვს.

ორგანიზაცია ანტიკორუფციული ბიუროს წერილზე დაყრდნობით აცხადებს, რომ მათ წინააღმდეგ ადმინისტრაციული წარმოება "გრანტის შესახებ" კანონის ფარგლებში დაიწყო.

"სალამის" განცხადებით, "რეპრესიული კანონების მიღებამ მნიშვნელოვნად გააუარესა მათი ორგანიზაციის მდგომარეობა და ხელოვნურად შექმნა ფინანსური, სამართლებრივი და პოლიტიკურ ბარიერები".

"ანტიკორუფციულმა ბიურომ პლატფორმა "სალამის" წინააღმდეგ დაიწყო რეპრესიული კანონის ამოქმედება. დღეს, 25 სექტემბერს, პლატფორმა "სალამმა ჩაიბარა ანტიკორუფციული ბიუროს წერილი, რომელიც პლატფორმის წინააღმდეგ დაწყებული ადმინისტრაციული წარმოების ფარგლებშია გამოგზავნილი. წერილის თანახმად, წარმოება დაწყებულია "გრანტის შესახებ" კანონზე დაყრდნობით, და ბიურო პლატფორმა "სალამს" სთხოვს გარკვეული სახის მოცულობითი და დეტალური ინფორმაციის მიწოდებას.

გაცნობებთ, რომ პლატფორმა "სალამი" წარმოადგენს ეთნიკური და რელიგიური უმცირესობების უფლებებზე მომუშავე ორგანიზაციას, რომლებიც საქართველოში ერთ-ერთ ყველაზე მოწყვლად სოციალურ ფენად ითვლება და ყოველდღიურად განიცდის სისტემურ დისკრიმინაციას.

რეპრესიული კანონების მიღებამ მნიშვნელოვნად გააუარესა პლატფორმა "სალამის" მდგომარეობა და შექმნა (და კვლავაც ქმნის) ხელოვნურ ფინანსურ, სამართლებრივ და პოლიტიკურ ბარიერებს. შედეგად, პლატფორმას ეზღუდება შესაძლებლობა, ეფექტიანად დაიცვას ეთნიკური და რელიგიური უმცირესობების უფლებები.

დღეს, რეპრესიული კანონების მეშვეობით, ხდება მცდელობა, რომ უმცირესობებს, რომლებსაც ისედაც შეზღუდული უფლებები აქვთ, სრულად წაერთვათ მათთვის დარჩენილი ბერკეტებიც. პლატფორმა "სალამი" განაგრძობს ბრძოლას და არ დაუშვებს უმცირესობების უფლებების წართმევას," — ნათქვამია განცხადებაში.

ასევე იხილეთ: