კომისარმა ევროკავშირის გაფართოების საკითხებში, მარტა კოსმა განაცხადა, რომ ბრიუსელი მზადაა სომხეთს 200 მილიონი ევროს (236 მილიონი დოლარი) გრანტი გამოუყოს "მდგრადობისა და ზრდის გეგმის" ფარგლებში.

კოსმა ეს განცხადება პარასკევს, ერევანში გამართულ პრესკონფერენციაზე გააკეთა.

სახელმწიფო საინფორმაციო სააგენტო "არმენპრესის" ცნობით, კოსის თქმით, დაფინანსება ხელს შეუწყობს კავშირუგაბმელობის, მდგრადობისა და ბიზნესის განვითარების ინვესტიციებს.

"ეს არის მტკიცებულება სომხეთის ერთგულებისა მკაფიო რეფორმების დღის წესრიგის მიმართ. ასევე, ეს ასახავს თქვენს ერთგულებას, განახორციელოთ რეფორმები საკვანძო სფეროებში," — განაცხადა კოსმა და დაამატა, რომ ევროკავშირი მზადაა სომხეთს მხარი დაუჭიროს ტრანსპორტის, ვაჭრობის, ენერგეტიკისა და ინფრასტრუქტურის პროექტებში "მშვიდობის გზაჯვარედინის" ინიციატივის ფარგლებში, რომელიც სომხეთის ტერიტორიაზე მეზობელი ქვეყნების სატრანსპორტო და ენერგეტიკული კავშირების განბლოკვას ითვალისწინებს.

"არმენპრესის" ინფორმაციით, კოსმა ასევე განაცხადა, რომ 2021 წლიდან მოყოლებული, სომხეთისთვის უკვე 2,5 მილიარდ ევროზე (2,9 მილიარდ დოლარზე) მეტია გამოყოფილი. მისი თქმით, ევროკავშირი აქტიურად მუშაობს საერთაშორისო და რეგიონთაშორისი კავშირგაბმულობის დღის წესრიგის შემუშავებაზე, რომელიც ევროპას, სამხრეთ კავკასიის გავლით, შუა აზიასთან დააკავშირებს.

აგვისტოს დასაწყისში, ვაშინგტონში, სომხეთმა და აზერბაიჯანმა მოილაპარაკეს საერთაშორისო მშვიდობისა და კეთილდღეობისათვის TRIPP-ის (Trump Route for International Peace and Prosperity) დამყარებაზე, რომელიც აზერბაიჯანს მის ექსკლავთან — ნახიჩევანთან — სომხეთის ტერიტორიის გავლით დააკავშირებს. ასევე, ორი ქვეყანა სამშვიდობო ხელშეკრულების ტექსტის საწყის ვარიანტზე შეთანხმდა.

კოსის ვიზიტი სომხეთში წინ უძღოდა მის ვიზიტს აზერბაიჯანში, სადაც მან ხაზი გაუსვა მშვიდობის პროცესით შექმნილ შესაძლებლობებს და აღნიშნა: "მშვიდობა რეგიონში ბაზრებისთვის, ვაჭრობისთვის და ინვესტიციებისთვის ხსნის შესაძლებლობებს."

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.