ქართველმა მომღერალმა და მსახიობმა გიორგი თორაძემ ევროვიზიის სიმღერის კონკურსზე საქართველოს წარდგენის სურვილი გამოთქვა. თორაძემ, სასცენო სახელით Torcho, თავისი ახალი სიმღერა Zardakhsha უკვე გაუგზავნა პირველ არხს, რომელიც ევროფესტივალისთვის ქართველი კონკურსანტის შერჩევაზეა პასუხისმგებელი.

Zardakhsha აღმოსავლური მოტივებით გაჯერებული ქართულენოვანი კომპოზიციაა, რომელიც მეორე სინგლია თორაძის სადებიუტო ალბომიდან. ენერგიული პოპ-სიმღერა გიორგი სანოძემ დაწერა, რომელიც ასევე ავტორია თორაძის ჰიტისა Getskina?!. ეს უკანასკნელი რამდენიმე კვირის წინ გამოვიდა და ქართულ ტიკტოკზე მალევე გახდა პოპულარული. სიმღერას ამ დროისთვის ნახევარ მილიონზე მეტი ნახვა აქვს იუთუბზეც.

რაც შეეხება თავად თორაძეს, გიორგი ევროვიზიასთან აქამდეც რამდენჯერმე გადაკვეთილა: იგი საქართველოს ჟიურის წევრი იყო 2023 წლის კონკურსზე. მან ასევე საქართველოს სახელით გამოაცხადა ქულები 2010 წლის საბავშვო ევროვიზიაზე.

თუმცა, Torcho ერთადერთი არაა, ვისაც ევროვიზიაზე საქართველოს წარდგენა სურს. იმის მიუხედავად, რომ 2026 წლის ევროფესტივალზე მონაწილეობა ჩვენს ქვეყანას ჯერ არც კი დაუდასტურებია, კონკურსში ჩართვის სურვილი უკვე გამოთქვა დოდონა ნამორაძემაც, რომლის თქმით, სიმღერა ბრიტანელ კომპოზიტორთან ერთად დაწერა და ფიქრობს, რომ მისით საქართველოს წარმატებას მოუტანს.

ევროვიზიაზე საქართველოს სახელით მონაწილეობის სურვილი აქვს ბარბარა სამხარაძესაც, რომელმაც ერთხელ უკვე სცადა საერთაშორისო კონკურსზე გასვლა — მაშინ, ტელეპროექტ საქართველოს ვარსკვლავში, ბარბარამ მეორე ადგილი დაიკავა.

ჯერჯერობით უცნობია, ისევ მიიღებს თუ არა შიდაშესარჩევ კონკურსში მონაწილეობას აშშ-ში მოღვაწე ქართველი მომღერალი Nini Iris, რომელიც წელს ევროვიზიის ქართველი ფანების მთავარ ფავორიტად მოიაზრებოდა.

საიუბილეო, რიგით 70-ე ევროვიზიის სიმღერის კონკურსს მომავალ წელს ავსტრიის დედაქალაქი ვენა უმასპინძლებს. იმის მიუხედავად, რომ ფესტივალისთვის სამზადისი ჯერ ადრეულ ეტაპზეა, კონკურსის გარშემო უკვე ხმაურიანი დებატებია — რამდენიმე მონაწილე ქვეყანა ბოიკოტით იმუქრება, თუკი ისრაელი ღონისძიებაზე დაიშვება.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...