ვეტერან მოკრივესა და ბიზნესმენს, გიორგი კანდელაკს და მასთან ერთად კიდევ 6 პირს ბრალი წარუდგინეს. პროკურატურის მიერ გავრცელებულ ინფორმაციაში ნათქვამია, რომ "დანაშაულებრივი ჯგუფის წევრების" "განზრახვა მოიცავდა აქციზურ მარკას დაქვემდებარებული განსაკუთრებით დიდი ოდენობით ღირებულების ალკოჰოლური სასმელების დამზადება-შენახვასა და მისი შემდგომი რეალიზაციით მატერიალური სარგებლის მიღებას".

"ფინანსთა სამინისტროს საგამოძიებო სამსახურის მიერ ჩატარებული გამოძიებით დადგინდა, რომ ბრალდებულებმა 2022 წლიდან, ფინანსური სარგებლის უკანონოდ მიღების მიზნით, ჩამოაყალიბეს ორგანიზებული დანაშაულებრივი ჯგუფი.

ჯგუფის წევრების განზრახვა მოიცავდა აქციზურ მარკას დაქვემდებარებული განსაკუთრებით დიდი ოდენობით ღირებულების ალკოჰოლური სასმელების დამზადება-შენახვასა და მისი შემდგომი რეალიზაციით მატერიალური სარგებლის მიღებას.

ბრალდებულებს ქალაქ გორში იჯარით აღებულ მიწის ნაკვეთზე მოწყობილი ჰქონდათ დანაშაულის ჩასადენად გამოსაყენებელი ინფრასტრუქტურა და სრული ტექნიკური აღჭურვილობა, სადაც სისტემატურად ახორციელებდნენ აქციზური მარკის სავალდებულო დართვას დაქვემდებარებული ალკოჰოლური სასმელების – ვისკისა და არყის აქციზური მარკის გარეშე დამზადებასა და შენახვას, მათი შემდგომი რეალიზაციის მიზნით.

დამზადებული ალკოჰოლური სასმელების რეალიზაციის გასამარტივებლად და უფრო მეტი სარგებლის მისაღებად კი ჯგუფის წევრები იყენებდნენ სხვადასხვა ცნობილი უცხოური ბრენდების დასახელებას და სასაქონლო ნიშნებს.

2025 წლის 16 სექტემბერს, ბრალდებულები მათი ძირითადი დანაშაულებრივი საქმიანობის მისამართზე, აქციზური მარკის გარეშე ინახავდნენ აქციზური მარკის სავალდებულო დართვას დაქვემდებარებულ განსაკუთრებით დიდი ოდენობით – 75 000-მდე ბოთლ ალკოჰოლურ სასმელს, რომელთა სავარაუდო ღირებულება რამდენიმე მილიონ ლარს აღემატება", – წერია პროკურატურის განცხადებაში.

გუშინ, 17 სექტემბერს, გავრცელდა ინფორმაცია იმის შესახებ, რომ ალკოჰოლის არალეგალური წარმოების ბრალდებით 7 პირი დააკავეს და მათ შორის არიან ვეტერანი მოკრივე და ბიზნესმენი გიორგი კანდელაკი და გორის საკრებულოს წევრი ბორია გოგიჩაიშვილი.

ფინანსთა სამინისტროს საგამოძიებო სამსახურის ინფორმაციით, შიდა ქართლში ამოიღეს სარეალიზაციოდ გამზადებული 75 137 ბოთლი უაქციზო ალკოჰოლური სასმელი, კერძოდ, არაყი "ბელუგა", "ბელვედერი", "გრეიგუსი", ვისკი "ბორკანი" და "ჩივას რეგალი". უწყების ცნობით, ჩხრეკისას ქარხანაში ასევე აღმოაჩინეს დაახლოებით 24 ტონა ალკოჰოლური სითხე და 318 000 კოლოფი უაქციზო სიგარეტი კარელია. უწყების ცნობით დაკავებულია დანაშაულში თანამონაწილე 7 პირი

ფინანსთა სამინისტროს საგამოძიებო სამსახურში გამართულ ბრიფინგზე ითქვა, რომ ბრალდებულებს შიდა ქართლის რეგიონში წლების განმავლობაში გააჩნდათ არალეგალური ალკოჰოლურო სასმელების მწარმოებელი ქარხანა.