"დაველოდოთ გამოძიებას, ყველა კითხვას გაეცემა პასუხი", — ასეთი იყო ოცნების ხელისუფლების მხრიდან, კონკრეტულად თბილისის მერის მიერ, გაკეთებული პირველი კომენტარი 2022-2024 წლებში 624 მილიონი აშშ დოლარის და 35 მილიონი ევროს გათეთრების საქმეზე, რომელზეც პროკურატურის ცნობით, ერთი პირია დაკავებული.

"აღნიშნულა საქმესთან დაკავშირებით ერთი შემიძლია გითხრათ - ძალიანა დიდი თანხის ოდენობაზეა საუბარი, ძალიან მძიმეა ეს ყველაფერი. დაველოდოთ გამოძიებას, ყველა კითხვას გაეცემა პასუხი", — თქვა კალაძემ.

ჟურნალისტის კითხვაზე, ხომ არ ფიქრობთ, რომ ირაკლი ღარიბაშვილამდე მივიდეს კვალი, კახა კალაძე ჟურნალისტებს მიმართავს, რომ "დაანებონ პოლიტიკურ სპეკულაციებს თავი".

"ეს ერთჯერადი შემოტანილი [თანხა] ხომ არ არის, წლების განმავლობაში, როგორც წავიკითხეთ და მოვისმინეთ, შესაბამისად დაველოდოთ გამოძიებას", ­ — თქვა კალაძემ.

გუშინ. 16 სექტემბერს, პროკურატურამ გაავრცელეა ინფორმაცია იმის შესახებ, რომ 2022-2024 წლებში 624 მილიონი აშშ დოლარის და 35 მილიონი ევროს უკანონო შემოსავლის ლეგალიზაციის ფაქტზე ერთი პირი დააკავეს. უწყება დაკავებულის ვინაობას არ ასახელებს, გავრცელებულ ინფორმაციაში ბრალდებულის არც ინიციალებია.

POG: 2022-2024 წლებში $624 მლნ-ის და €35 მლნ გათეთრების ფაქტზე 1 პირი დააკავეს