ჩეჩნეთის ლიდერის, რამზან კადიროვის მეგობარ, MMA-ს ჩეჩენ მებრძოლს, ხამზათ ჩიმაევს თბილისში Ferrari აჩუქეს. საჩუქრის გადაცემის ამსახველ ვიდეოს თბილისის მერი კახა კალაძე სოციალურ ქსელში აქვეყნებს და წერს: "კეთილი იყოს შენი თბილისში ჩამოსვლა ჩემი ძმაო". გავრცელებული ვიდეოში კახა კალაძეც ჩანს. ვიდეო Forza-Tbilis-შია გადაღებული, რომლის მფლობელიც ბიზნესმენი და კახა კალაძის მეგობარი საბა მიქავაა.

სოციალურ ქსელში გავრცელებული ფოტო-ვიდეომასალიდან ირკვევა, რომ საჩუქრის გადაცემის შემდეგ ჩიმაევი წალენჯიხას სტუმრობდა. ერთ-ერთ ფოტოში ქართული ოცნების წევრი ირაკლი ზარქუაც ჩანს.

დღეს კახა კალაძემ ჟურნალისტების კითხვას ხამზათ ჩიმიაევთან დაკავშირებით არ უპასუხა.

შეგახსენებთ, რომ ხამზათ ჩიმაევს კახა კალაძემ 2024 წლის დეკემბერში უმასპინძლა.

"ხამზატს რაც შეეხება, ის არის მსოფლიოში ერთ-ერთი წარმატებული სპორტსმენი. მე მასთან ვმეგობრობ, ძალიან კარგი ურთიერთობა მაქვს", — თქვა მაშინ კახა კალაძემ თბილისში ხამზათ ჩიმაევის ვიზიტზე კომენტირებისას. მისი თქმით, ის მეგობრებს პოლიტიკური ნიშნით არ არჩევს.

"ხამზატს რაც შეეხება, ის არის მსოფლიოში ერთ-ერთი წარმატებული სპორტსმენი. მე მასთან ვმეგობრობ, ძალიან კარგი ურთიერთობა მაქვს. მიხარია, რომ ასეთი წარმატებული სპორტსმენები სტუმრობენ ჩვენს დედაქალაქს, ჩვენს ქვეყანას. მიზანი არაფერი, ტურისტულად ჩამოვიდა საქართველოში და მომავალში კიდევ მეტი ადამიანი ჩამოვა.

ჩვენ პოლიტიკური შეხედულების გამო არ ვმეგობრობთ. მე არავისთან არ ვმეგობრობ პოლიტიკური შეხედულების გამო. მყავს მეგობრები, თუნდაც ქვეყნის შიგნით, ვისაც შეიძლება ჰქონდეს განსხვავებული პოლიტიკური შეხედულება. ეს ვერ იქნება განმსაზღვრელი - მე ვინმესთან ვიმეგობრებ, ან არ ვიმეგობრო", — თქვა კახა კალაძემ თბილისში ხამზატ ჩიმაევის ვიზიტზე კომენტირებისას "ტვ პირველთან".